Reprezentante partidu polítiku no veteranu sira ne’ebé fó apoiu ba kandidatu Prezidente Repúblika tinan 2017-2022, Francisco Guterres Lu Olo  úniku kandidatura Estadista ida, ne'ebé hatene Estadu ho di'ak no  ema ne'ebé hatene di'ak Konstituisaun Repúblika Demokrátika Timor-Leste nian.

Lu Olo bele garante normál funsionamentu Estadu RDTL no ema ida ne'ebé mak bele halo reprezentasaun ekilibradu ba Estadu no Povu Timor-Leste, iha rai laran no mós iha rai li'ur.

 Lu Olo sei koopera di'ak ho governu atu Timor-Leste bele hetan benefísiu nu'udár membru CPLP nian no CPLP atu mós benefísiu husi Timor-Leste ninia adezaun no ema ne'ebé bele halibur ema hotu-hotu nia interese

Lu Olo sei promove diálogu ho instituisaun sira hotu Estadu nian no mós ho instituisaun sira ne'ebé la'ós Estadu nian no sei garante kondisaun ba tranzisaun lideransa Nasaun nian.

 Lu Olo ema ida ne’ebé kompriende di'ak povu Timor-Leste nia hakarak no nia nesesidade no Lider ida ho valores família, sosiál, kultura no relijioza ne’ebé ás inklui sei luta ba inkluzaun sosiál no ekonómika ba povu Timor-Leste tomak.

 Lu Olo sei fó atensaun makaas ba kestaun sira kona ba feto no labarik sira no sei luta ba envolvimentu no partisipasaun juventude sira nian iha aspetu hotu-hotu dezenvolvimentu Timor-Leste nian inklui Liu husi ninia esperiénsia rasik, Lu Olo hatudu katak nia reprezenta lealdade, perseveransa, rezisténsia, konsensu no sabedouria inklui sei halo buat hotu atu garante unidade

“Ami husi partidu lima hanesan CNRT, FRETILIN, CASDT, UNDERTIM no PEP hamutuk ho veteranu iha Timor tomak ohin deklara sai kata ami depozita konfiansa tomak hodi apoiu ba kandidatura presidente repúblika Francisco Guterres Lu-Olo atu sai aman ba nasaun”, deklara porta Voz Francisco Vasconcelos iha sede kampaña -Ai mutin –Dili, horisehik.

Iha fatin hanesan, Vise Presidente Partidu CNRT Virgílio Smith hatete, partidu CNRT hahú husi presidente to’o nia militante bai-bain halo ona konsensu ida hodi fó konfiansa ba Francisco Guterres Lu-Olo atu sai ba presidente repúblika ba povu tomak.

Tuir nia, deklarasaun ne'ebé fó sai husi partidu CNRT bazeia ba maun boot Xanana nia deklarasaun katak Lu-Olo ema ne'ebé iha esperiénsia koñese di'ak konstituisaun no hatene knar presidente repúblika.

Tanba ne’e nia apela ba povu eleitór liu-liu ba kuadru no militante partidu CNRT iha baze atu iha loron 20 Marsu bele hakbesik aan ba sentru votasaun atu bele vota ba kandidatura númeru 2 Francisco Guterres Lu-Olo atu bele hetan Vitória.

Entretantu, Presidente Partidu Esperansa Pátria Ano Gusmão deklara katak nia lori militante rihun 40.109 hodi mai apoiu kandidatura Lu-Olo atu bele lori Vitória.

Sekretáriu jerál partidu UNDERTIM Francisco Manu-Bui hatete, nia partidu apoiu ba Lu-Olo tanba hanesan nia kompaneiru luta no nia iha vizaun no misaun ne'ebé kle'an tebes hodi dezenvolve nasaun ne’e.

Nia dehan,  uluk kedas kompromisu ne’e kesi ona  dezde funu tinan 24 iha ai laran to’o mai ukun aan mós nia sempre envolve aan iha prosesu dezenvolvimentu hodi ba kaer pasta hanesan presidente parlamentu nasionál hodi inisia lejizlasaun.

Presidente partidu CASDT Gil Alves hatete, nia partidu ho kuadru polítiku sira sei vota hotu ba Lu-Olo atu bele lori nasaun ne’e ba oin tanba nia hanesan veteranu ida ne'ebé iha esperiénsia hodi bele garantia no hakuak ema hotu no bele garantia estabilidade nasionál.