Ohin, 17 Marsu 2017, remata kampaña ba kandidatura númeru rua Francisco Guterres ‘Lu-Olo’ iha Tasi-Tolu no kandidatu António da Conceição iha Munisípiu Likisá.

Ho situasaun ne’e, Segundu Komandu PNTL Munisípiu Dili, Superintendente Asistente Euclides Belo, apela ba apoiante husi kandidatura na'in rua nia keta provoka malu hodi kria konflitu iha Dili laran.

Nia dehan dehan, ba apoiante sira ne’ebé hakarak halo asaun konflitu polisia sei la tolera. Sei foti medida ne’ebé rigorozu ba autór ka suspeitu sira ne’e.

“Ba apoiante se de'it maka hakarak halo asaun, Polisia sei halo atusaun”, dehan Euclides, iha edifísiu PNTL Munisípiu Dili, horisehik.

PNTL sei halo atuasaun bazeia ba despaxu Primeiru Ministru nian ne’ebé hatún ona ba komandu PNTL hodi atua situasaun ho rigorozu hasoru apoiante sira.

Alende ne’e Komandante ne’e sama atensaun ba apoiante sira hodi proibi motorizada sira uza kanu racing provoka situasaun iha kapitál Dili.

Bainhira motór sira ne’ebé kontra regulamentu rodaviaria, PNTL halo infrasaun hasoru viatura sira ne’e.

Tanba ne’e, husu ba apoiante sira uza oportunidade hodi la halo barullu iha fatin públiku, tanba ne’e Komandu hatún ona despaxu hodi la tolera asaun vandalizmu sira ne’e.