Ministru Estadu Prezidensiál no Konsellu Ministru (PKM), Hermenegildo ‘Agio’ Pereira hateten, Konsellu Ministru aprova rezolusaun ida hodi fó apoia umanitária ba Indonézia ne’ebé semana kotuk mosu terramotu ho magnitudu 7,5 Scale Richter, iha Illa Sulawesi.
“Lori naran povu tomak halo rezolusaun ida espresa ita nia atitude solidariedade ba vítima sira terramotu no tsunami iha illa Sulawesi Indonézia nian”, dehan nia, iha Palasiu Governu, horisehik.
Tuir nia, Konsellu Ministru orienta ba Ministériu Negósiu Estranjeiru no Kooperasaun (MNEK) hodi koordena ho Embaixadór Indonézia iha Timor-Leste, nune’e entrega apoia umanitáriu ba komunidade vítima sira iha sidade Palu-Sulawesi.
Ne’e duni, iha rezolusaun ne’e Governu apoia orsamentu ho montante $750, nu’udar resposta hodi hataan ba nesesidade ne’ebé provoka ikus mai estragu afeta husi rai nakdoko ne’ebé akompaña ho tsunami.
Agio Pereira dehan, montante orsamentu ne’ebé Governu apoia umanitária ba Indonézia ne’e hanesan mós montante ne’ebé akontese uluk iha dezastre naturais iha Indonézia, tinan kotuk.
Tanba ne’e, Governu Timor-Leste apoia umanitária ba Sulawesi-Indonézia nu’udar país viziñu no mós nasaun ne’ebé kooperasaun bilaterál iha área ekonomia, sosiál, polítika no kultura.
