“Ha’u nia mandatu ne’e hotu ka la hotu ne’e desizaun polítika, ha’u nia preokupasaun ha’u no ha’u-nia hakarak ne’e estabilidade de’it”, dehan nia, iha Palasiu Prezidensiál Bairru-Pité, horisehik.
Nia dehan, tanba F-FDTL la'ós mosu mai de’it no la'ós formasaun governu nian, maibé Forsa Armada Libertasaun Independénsia Timor-Leste (FALINTIL) maka klamar ba forsa defeza.
Laiha rezerva ba Lere atu kontribui nasaun tanba durante tinan 24 hatudu sakrifísiu hodi lori nasaun no povu ne’e to’o hetan ukun rasik-aan.
“Se karik sira maka hakarak prolonga tan ha’u nia mandatu ne’e mós ha’u prontu nafatin prolonga”, tenik Lere.
Agora daudaun situasaun muda ona kompara ho tinan 24 iha ai-laran. Tanba agora tuur de'it iha AC laran no sa'e karreta bele mós pasiar ba rai li'ur. Maibé kestaun maka Lere hakarak oinsá halo transformasaun husi lideransa gerrilleiru ba forsa profisionál.
Antes ne’e, Ministru Defeza (MD) Filomeno Paixão aprezenta ona karta substituisaun ba Konsellu Ministru (KM) hodi diskute.
Hafoin diskusaun iha nivel governu remata sei aprezenta ba Prezidente Repúblika nu’udar mós Komandante Supremu atu foti desizaun.
FRETILIN-CNRT Hakarak Estende Mandatu Jenerál Lere
Entretantu, Bankada Partidu boot rua iha Parlamentu Nasional hanesan FRETILIN no CNRT hakarak Governu atu kontinua estende mandatu Xefe Estadu Maiór Jenerál, Lere Anan Timur, atu kontinua lidera F-FDTL ba períodu ida tan.
Deputadu Bankada FRETILIN, Joaquim dos Santos hatete, Estadu sei presiza Lere atu kaer instituisaun FFDTL, tanba iha autoridade morál hodi sai mestre ba forsa foun sira.
Deputadu ne’e hatete, iha instituisaun FFDTL ema barak ne’ebé iha potensiál atu bele troka Lere, maibé iha períodu ida husik atu bele asegura nafatin koezaun internal instituisaun hodi garantia valór morál militár nian ba forsa foun sira.
Nune’e, husu kuandu Lere Anan Timur nia-mandatu remata Governu atu indijita ema seluk karik tenke haree duni ba interese nasionál nian, maibé labele politiza fali asuntu militár nian.
Karik iha ona figura di'ak ida atu troka laiha buat ida, maibé Lere rasik mós sei bele produs efeitu di'ak ba forsa foun sira iha futuru.
Iha fatin hanesan, Presidente Bankada Partidu CNRT, Duarte Nunes hatete, karik Ministériu Defeza haree tempu ona atu substitui ona Xefe Estadu Maiór Jenerál Forsa Armada laiha buat ida, maibé importante mak tenke garante situasaun iha instituisaun F-FDTL atu labele halo ema barak laran taridu.
Lere Anan Timur hanesan figura importante, tanba ne’e karik instituisaun sei presiza tenke fó informasaun, karik atu substitui instituisaun tenke arranja kondisaun atu bele husik hela instituisaun.
