Nia dehan, aprezentasaun deputadu ne'e nian iha plenária la loos, tanba durante kampaña la’o to’o agora laiha funsionáriu parlamentu ida nunka uza karreta estadu ba tuir kampaña.

Mateus hatutan, difisil ba funsionáriu sira uza karreta estadu parlamentu nian, karreta sira ne’e kontrola ho Global Positioning System (GPS). Ne’e duni, sé mak uza ba iha ne'ebé sempre iha kontrolu.

Nia esplika, iha duni karreta operasionál ida ne’ebé deputadu ida mak uza ba Maliana hodi partisipa jogu Liga Amadora, tanba deputadu ne’e nia karreta aat. Ne’e duni, la’ós funsionáriu mak uza ba halo kampaña.

“Ami deteta ona husi GPS karreta ho kór metan, xapa matríkula 92, ne’e karreta operasionál parlamentu nasionál nian ne'ebé deputadu ida mak uza la'ós ba halo kampaña, maibé ba joga (liga amadora), iha Maliana”, dehan Mateus.

Sekretáriu Jerál PN konfirma ona ba deputadu ne’e dala ruma haree sala, tanba karreta ne’e la kesi bandeira partidu nian, maibé ne’e kesi bandeira klube futeból bainhira ba joga iha Maliana.

Antes ne’e, Deputadu Parlamentu Nasionál, Jacinto Viegas Vicente Roque duun funsionáriu parlamentu nasionál utiliza veíkulu estadu hodi tuir kampaña eleisaun prezidensiál, iha Munisípiu Bobonaru, foin lalais ne’e.

Deputadu ne’e dehan, bainhira kampaña kandidatura balun iha Maliana, nia haree karreta parlamentu nasionál ida kesi ho bandeira hodi atravesa iha momentu ne'ebá.

Karreta ne’e kór metan, maibé deputadu ne’e la konsege haree karreta ne’e nia xapa matríkula no sé lori tanba karreta ne’e halai makaas.