Xefe Unidade Prevensaun Moras HIV/SIDA, Ministériu Saúde, Frederico Bosco hateten, iha tinan kotuk liu husi parseiru sira identifika kazu hamutuk 90.
Husi númeru ne’e, maioria identifikasaun ho inisiu moras tuberkuloze (TB) ho totál pasiente hamutuk 74. Nune’e, deteta ona ema na’in neen ne’ebé pozitivu HIV/SIDA husi munisípiu neen.
Prevensaun ba moras ne’e rasik, ministériu saúde esforsu servisu hamutuk ho parseiru lubuk ida liu husi sosializasaun no edukasaun sívika.
Iha fatin hanesan, Comisaun Nasional Combate HIV/SIDA (CNCS-TL) liu husi sosializasaun ba enfermeira husi universidade UNTL, Institutu Cienciais Saúde (ICS), Institu Superiór Cristal (ISC) no UNITAL alerta atu atu prevensaun imediata, antes kazu ne’e sa'e makaas liután.
Kazu Tokon 5.1 iha Rejiaun Ázia Pasífiku
Iha Rejiaun Ázia Pasífiku ema ne'ebé kauza ba moras HIV/SIDA hamutuk tokon 5.1. Husi númeru ne’e, feto hamutuk tokon 1.8, labarik 340.000 no na’in 19.000 mak mate ona.
Technical Officer Organizasaun Saúde Mundiál iha TL Karthikenyan katak, iha rejiaun Ázia Pasífiku dadus ikus ema hamutuk tokon 5.1 hetan moras HIV.
“Moras HIV/SIDA sai hanesan problema ba rejiaun Ázia pasifika nian,” dehan nia.
Númeru ne’e, maioria nasaun boot mak kontribui kazu barak ho ninia ekonomia mediu no boot.
