Manifestasaun ne’e halo hodi ezijé ba estadu atu kria fasilidade ba estudante sira.

Iha momentu manifestasaun la’o hela, estudante husi fakuldade enjeñaria no agrikultura ne’ebé partisipa iha asaun ne’e ‘hurulele-malu’.

Rezultadu husi akontesimentu ne’e, estudante husi fakuldade agrikultura hetan tuku husi estudante enjeñaria iha parte oin.

La’ós ne’e de’it, estudante sira ne’e mós estraga patrimóniu universitáriu nian hanesan odamatan, didin uma, karteira no karreta reitoria nian.

Manifestasaun hala’o maizumenus tuku 09:00 dadeer, iha Kampus UNTL Sentrál. Iha inisiu manifestasaun sei la’o ho normál, maibé to’o meiudia situasaun komesa la kontroladu. Bainhira reitór UNTL fó deklarasaun estudante sira komesa runguranga no lakohi atu rona.

Nune’e, derrepente estudante sira rasik mak baku malu, inklui estraga sasán eskola nian. Liu tiha minutu balun polisia to’o iha fatin, maibé estudante sira taka portaun metin. Maski nune’e, seguransa konsege tama hodi hakalma situasaun.

Iha atuasaun polisia nian konsege kaptura estudante balun ne’ebé estraga sasán eskola nian.

Ezije Hadi'a Fasilidade Universitáriu

Objetivu husi manifestasaun ne’e rasik, senadu fakuldade sira ezije ba reitoria UNTL atu hadi’a fasilidade universitáriu nian ne’ebé kuaze avaria hotu ona.

Portavós Fakuldade Ciencia Sociais (FCS), Romaun Piedade Mendonça hatete, asaun ne’e kontinuasaun akordu iha tinan kotuk, ne’ebé reitoria UNTL promete atu halo manutensaun ba fasilidade eskola.

“Situasaun ne’e la kondís ona ho situasaun reál, tanba ne’e husu atu hadi'a fasilidade sira ne’ebé avaria,” dehan nia, iha Kampus Sentrál UNTL, horisehik.

Iha fatin hanesan, estudante Fakuldade Enjeñaria, Silvério dos Santos Pereira hatete, partisipa iha manifestasaun ne’e hodi ezije kona-ba fasilidade transporta ne’ebé tula estudante sira husi Dili ba Hera.

Universidade hapara bís ne’ebé durante ne’e tula estudante sira tanba avaria, ne’ebé prejudika ba prosesu aprendizajen estudante sira.

Maski nune’e, seidauk iha solusaun ruma hodi rezolve problema ne’e. Ne’e duni, estudante enjeñaria husi ba buka alternativa ba situasaun ne’e.

Hataan ba kestaun ne’e, Reitór UNTL, Francisco Miguel Martins hatete, reitoria hakarak universidade sai nabilan, maibé alokasaun orsamentu husi Estadu nian tenke jere tuir ninia dalan.

“Ita nia orsamentu aloka husi estadu atu implementa orsamentu ne’e tuir prosedimentu ne'ebé loloos, kuandu la loos ba hataan iha tribunál”, tenik nia ba estudante sira.

Nia hatutan, ezijénsia husi estudante sira tenke rezolve etapa por etapa, tanba universidade boot no orsamentu operasionál ne'ebé aloka ki'ik. Ne’e duni, labele halo buat hotu dala ida.

Projetór ne’ebé avaria, reitór orienta ona ba funsionáriu sira atu hadi’a, maibé ninia problema mak eletrónika mak la di'ak tanba ne’e tenke sosa foun.

Tuir nia, orsamentu operasionál uitoan no balun tenke selu fali ba dosente internasionál no nasionál sira. Ne’e duni, osan la to’o atu sosa sasán sira ne’e hotu.

Kona-ba karreta fasilita estudante enjeñaria sira, iha bís rua maibé ida mak aat. Oras ne’e daudaun reitoria koordena ona ho parte transporte terrestre atu hadi'a iha tempu badak nia laran.