Eleisaun antesipada ne'ebé sei mai ne’e sei lori duvida, tanba lider no polítiku na'in lubuk ida mak sei kontinua se kotuk ba malu iha povu barak nian oin. Husi hahalok sira ne’e bele provoka emosaun ánimu no konfuzaun.

“Keta agora mundu foun sira ba trata no kritika malu de’it ona karik. Keta karik mós balun ba duun ida seluk na'ok-teen no buan karik”, teni nia.

Nia husu ba lider no polítiku na'in sira atu sai ema edukadu no matenek para mundu bele kontinua foti nafatin Timor.

Nu’udar lider másimu iha instituisaun F-FDTL kontinua esforsa makaas para atu neutraliza situasaun bainhira EA realiza. Tuir nia katak ida ne’e de’it mak dalan di'ak ba Timor para atu hetan nafatin ninia valór di'ak iha mundu internasionál.

Lere afirma FFDTL sei halo esforsu tomak para atu mantein pás no estabilidade iha nasaun ne’e. Susesu ne'ebé sei mosu presiza ema hotu ninia partisipasaun no kolaborasaun, hahú husi lider polítiku na'in sira labele se kotuk ba malu maibé tenke rona malu. Atu nune’e, iha tempu kampaña laran bele sai ezemplu di'ak ba mundu tomak.