Sidadaun ida idak tenke ba vota iha suku ne’ebé rejistu ba, atu  nune'e bele kontrola votante sira labele vota dala rua, tanba daudaun ne’e Timor Leste sei kontinua utiliza sistema manuál.

Prezidente CNE, Alcino Barís hatete, CNE kontinua atualiza sistema vota tuir unidade jeográfika.

CNE  seidauk autoriza  votante sira atu vota iha fatin seluk, tanba risku ba númeru votasaun.

“Atu evita buat sira ne’e mak ami orienta ema ida idak tenke vota tuir suku ne’ebé nia rejistu ba. Tanba ne’e mak atualizasaun baze de dadus kontinua loke to’o ohin loron,” dehan Alcino ba Jornalista Iha otél Timor Dili, Sesta (26/1).

CNE mós kontinua loke sistema atualizasaun  baze de dadus ba sidadaun ne’ebé hakarak muda nia eleitorál hodi  vota iha sentru de votasaun ne’ebé besik, bainhira eleisaun remata mak bele muda fali.

Tuir  planu, CNE sei koordena ho STAE atu kontinua tau konsiderasaun ba sidadaun Timoroan sira ne’ebé hela iha rai li'ur, liuliu Inglaterra, Irlanda, Koreia do Súl, Austrália atu  bele partisipa iha eleisaun antesipada.

Alcino mós informa katak, sidadaun ida idak tenke ba vota tuir suku tanba lei mak orienta.

Bainhira Timor Leste utiliza ona sistema vota online, mak foin bele vota iha kualkér sentru votasaun.

Too Oras ne’e Timor Leste sei utiliza lei tuan no 09/2017 no seidauk iha lei foun atu regula sidadaun sira hodi ba vota iha fatin ne’ebé de'it.

Entretantu, iha Sesta loron 26 Fulan Janeiru tinan rihun rua sanulu resin ualu / Prezidente Repúblika Francisco Guterres Lu Olo uza ninia kompeténsia hodi deside ona destinu impase polítika ne'ebé la’o durante fulan neen.

Desizaun ne’e maka disolve Parlamentu Nasionál tuir Konstituisaun Repúblika artigu 86 alínea f.

PR mós konvida ona Povu Timor Leste tomak, atu fila fali ba vota.

Kona ba data fiksu ba eleisaun antesipada, PR sei determina iha tempu badak nia laran.