Prezidente Bankada KHUNTO, Luis Roberto, hatete bazeia ba Konstituisaun artigu 106, primeiru ministru hili husi partidu ne'ebé iha votu barak liu ka husi aliansa partidu sira ne'ebé nia ema barak iha Parlamentu Nasionál.

Ne’e duni, haree husi desizaun Prezidente Repúblika nian, hatudu katak nia hakat liu ona konstituisaun hodi halo desizaun afavór ba partidu FRETILIN.

“Iha Prezidente Repúblika Ramos Horta no Taur Matan Ruak nia tempu sempre entrega ba AMP, maibé iha VII Governu foin maka Prezidente Repúblika deside ba Eleisaun Antesipada”, dehan nia, iha Uma Fukun PN, horisehik.

Tuir nia, Prezidente Repúblika disolve Parlamentu Nasionál bazeia Konstituisaun artigu 86 alínea F ne'ebé haree katak laiha baze fundamentál, maibé haree fali ba polítika. Tanba ne’e, desizaun ne’e bele afavór ba polítika FRETILIN nian.

“Ba eleisaun antesipada ami husi AMP prontu atu kompete ho maun boot Kay Rala Xanana Gusmão, Taur Matan Ruak no Nai-Mori nia lideransa. Fiar katak AMP sei hetan votu barak liu iha eleisaun”, tenik nia.

Iha fatin hanesan, Prezidente Bankada CNRT, Arão Noe de Jesus hatete, desizaun Xefe Estadu nian ne’e di'ak liu atu povu bele deside hodi fó ukun ne’e ba partidu ne'ebé sei ukun.

“Atu bolu atensaun de'it ba ita katak ukun ho minoria ne’e labele akontese tan, atu nune’e Estadu ne’e labele monu tan ba situasaun hanesan ne’e”, tenik nia.

Iha eleisaun ne’e mak akontese nafatin partidu ida la manan absoluta, la'ós atu fó de'it ba maioria simples atu ukun, maibé tenke haree ba kondisaun partidu ne'ebé bele garante maioria iha Parlamentu Nasionál atu bele asegura governu ida ne'ebé forte.

Tanba ne’e, karik situasaun ne’e akontese fila-fali atu halo desizaun mós tenke hanoin didi'ak atu povu ne’e labele halo votasaun hodi lakon tempu de'it.

AMP dezde inísiu prontu atu hasoru kualkér situasaun saida de'it, tanba ne’e hakarak atu hakotu lalais impase polítika.

Maibé, atu deside naran saida atu lori to’o eleisaun ne’e iha tempu badak nia laran sei iha enkontru altu nivel husi partidu tolu ne’e hodi deside konjuntura polítika ba ukun nian ne’e oinsá.

Hanoin ne'ebé hakarak atu lakohi moris nafatin iha impase polítika partidu ki'ik sira ne'ebé hanoin hanesan ho AMP oras ne’e daudaun mós mai hamutuk ona ho atu hatuur fali estadu ida ne’e iha nia fatin loloos.

Atu hatuur Estadu ne’e iha nia fatin loloos mak tenke liu husi dalan eleisaun. Tanba ne’e, hakarak ka lakohi iha eleisaun partidu ida tenke manan maioria absoluta.