Komandu Jerál PNTL, Komisáriu Júlio Hornay hatete, entre númeru sira ne’e balun sei iha prosesu investigasaun nia laran.

“Tina kotuk ita aplika pena suspensaun hasoru membru 50, pena multa ualu (8), resensaun eskrita 30, inklui proposta demisaun ba membru sira 16,” dehan komisáriu Júlio, iha diskursu Aniversáriu PNTL ba dala XVII, iha Sentru Formasaun PNTL Komoro-Dili, horisehik.

Husi kazu krime ne’ebé membru polisia envolve entrega ona ba ministériu públiku, nune’e sira ne’ebé komete indixiplinadu kontinua prosesu iha instituisaun laran.

Kazu sira ne'ebé membru sira komete dala barak halo hasoru instituisaun FALINTIL-Forsa Defeza Timor-Leste (F-FDTL), estudante no sidadaun baibain.

Komandu sei kontinua halo avaliasaun hodi rekolla dadus ne'ebé membru sira komete, hodi kontinua levanta kazu ba prosesu investigasaun.

Liu husi Aniversáriu ba dala XVII, komandu jerál PNTL esplika katak atitude husi membru polisia balun kontinua hafo'er prestíjiu instituisaun nian.

Apezarde desizaun dixiplinár ne’ebé komandu foti ba nia membru, halo mós demisaun, suspensaun, multa, deskrisaun eskrita no verbál la'o nafatin, maibé infrasaun kontinua mosu.

“Ita durante tinan 17 nia laran ona maibé individu balun kontinua komete infrasaun hodi hafo'er prestíjiu instituisaun”, dehan nia.

Komisáriu Júlio dehan, situasaun ne’e mosu halo sosiedade sivíl ho komunidade sira lamenta.

Kritika sira ne’e hatudu katak sosiedade no komunidade iha domin ba instituisaun no hakarak nia-ema serve povu ho dignu no respeita.

Tanba ne’e, kritika no sujestaun sosiedade nian atu dezenvolve liután profisionalizmu instituisaun nian.

Tuir nia haree, prosesu dezenvolvimentu polisia la'o di'ak tebes, maski neineik maibé kada tinan sempre iha mudansa, tantu iha rekursu materiál, rekursu umanu no bem estar membru polisia.