Xefe Estadu hato’o saudasaun ba polisia no sivíl sira ne'ebé loro-loron kolabora hodi kaer metin seguransa iha rai laran, hametin legalidade demokrátika, tane aas no asegura identidade nasionál.

“Sira (PNTL) nia sentidu devér disponibilidade makaas tebes atu proteje no serve ita nia sidadaun sira iha ita-nia rai”, dehan nia, liu husi diskursu iha selebrasaun aniversáriu PNTL ba dala XVII, iha Sentru Formasaun Akademia, Komoro-Dili horisehik.

Aproveita tempu, Xefe Estadu mós kongratula povu Timor-Leste ba partisipasaun iha eleisaun ne’ebé la’o hakmatek no tuir orden. Hein katak situasaun hanesan garantia nafatin to’o eleisaun lejizlativu.

Nia hatutan, klima seguransa ida ne’e bele sai posivel tan knaar importante husi PNTL no FFDTL no parseiru sosiál sira hodi asegura ambiente ne'ebé nakonu ho hakmatek, independénsia no neutralidade, nu’udar kondisaun ne'ebé presiza hodi harii Estadu Direitu.

Prosesu konstrusaun Estadu demokrátiku iha nasaun nurak mai husi períodu ne'ebé nakonu ho konflitu, dezafiu polítiku, sósiu-ekonómiku oioin, inklui problema seguransa rai laran, ne'ebé presiza duni profisionalizmu no dedikasaun polisia no forsa.

Nia esplika, seguransa hanesan direitu fundamentál sidadaun hotu-hotu nian, ne'ebé Estadu tenke promove no asegura. Laiha seguransa mak laiha moris di'ak, estabilidade no dezenvolvimentu ekonómiku.

Husi parte seguransa sira iha devér atu adapta sira-nia realidade no lala'ok tuir nesesidade sosiedade nian. Tanba ne’e, polítika seguransa tenke buka konseitu foun kona-ba seguransa ba defeza no protesaun sosiedade sira nian ne'ebé sei envolve komunidade tomak no orienta bazeia ba pontu fundamentál tolu hosi polítika seguransa interna: sidadania, modernizasaun no prosimidade.

Xefe Estadu hatutan, tenke investe makaas iha infraestrutura no ekipamentu, ho objetivu atu hasa'e kapasidade operasionál no valoriza ajente sira-nia karreira, hodi rekoñese kondisaun polisia nia espesialidade sira.