Vise-Prezidente Parlamentu Nasionál, Luis Robertu hatete, programa ne’ebé atu aprezenta la sees husi nesesidade povu nian, liu-liu ba bee moos, saneamentu, estrada, eletrisidade, edukasaun, saúde, agrikultura, turizmu no nesesidade sosiál sira seluk ne’ebé importante ba povu nia moris.

“Ha’u haree ba programa ne’e prioridade tebes no importante ba povu nia moris, tanba ne’e ami husi AMP fiar katak programa ne’e sei pasa”, dehan nia, iha Uma Fukun PN, horisehik.

Nia hatutan, haree ba programa importante tebes, tanba ne’e hanoin katak deputadu 65 sei iha konsensu hodi debate ho di'ak to’o finál, nune’e fó biban ba governu hodi implementa atu bele hadi'a ona povu nia moris.

Luis garante debate programa VIII Governu iha loron tolu nia laran ne’e sei la’o di'ak to’o remata, tanba lider bankada sira enkontru ona hodi halo ona giaun atu la’o tuir.

Situasaun hirak ne’ebé antes ne’e akontese iha debate VII governu ne’e sei la repete hikas iha debate programa VIII Governu nian, tanba situasaun la hanesan, uluk ne’e governu minoria, nune’e ohin loron ne’e governu maioria iha PN. Tanba ne’e, buat hotu sei la’o di'ak ho susesu to’o diskusaun remata.

Entertantu, Destinu VIII Governu ne’ebé lidera Primeiru Ministru (PM), Taur Matan Ruak, bainhira ameasadu deputadu maioria husi CNRT, PLP ho KHUNTO hamutuk 34 mak salva, liuliu iha aprezenta programa no diskusaun Orsamentu Jerál Estadu.

Diskusaun programa Governu ne’e rasik PM Taur hamutuk ho membru Governu tomak sei hakaat ba PN hodi diskute.

Ministru Reforma Lejizlativa Asuntu Parlamentár, Fidelis Magalhães Leite hateten, bainhira programa Governu la hetan rejeisaun husi deputadu opozisaun sira, programa ne’e rasik sei implementa bazeia ba kompromisu antes ne’e hato’o ba públiku.

“Ami fiar Governu ne’e sustenta husi deputadu 34 husi Parlamentu bainhira Governu ne’e hetan apoia ka sustentasaun iha PN”, dehan nia, iha Palasiu Governu, horisehik.

Nia dehan, bainhira deputadu 34 husi bloku AMP maka apoia Governu orsamentu jerál sei pasa no programa Governu mós aprovadu no garantia estabilidade durante mandatu ukun tinan lima.

Nune’e, nia espera Governu sei la monu bainhira deputadu ne’ebé hetan maioria 34 kadeira kontribui makaas, tanba programa ne’ebé atu aprezenta ne’e fó benefísiu ba nasaun.

Ne’e duni, Governu ne’e espera katak opozisaun FRETILIN-PD sei la vota kontra bainhira Governu lori programa no OJE ba PN, tanba atu implementa ne’e sei fó benefísiu ba povu ho Estadu.