“Ha’u husu ba jornalista ida-idak atu buka hala’o beibeik jornalizmu investigativu, katak tenke buka hatene loloos no kle'an, husi fonte oioin no husi sorin rua ne’ebé haksesuk malu, molok fó sai informasaun ba públiku, atu povu bele fó fiar nafatin ba jornalista sira, nu’udar edukadór sériu no rigorozu,” mensajen husi Prezidente Repúblika liu husi nia Xefe Kaza Sivíl, iha Forum Diálogu Dili, Sesta (20/7).

PR Lú-Olo dehan jornalista sira tenke iha rejistu informasaun nafatin hodi hatutan ho informasaun atualizada husi kontestu situasaun ketak-ketak, maibé koerente nafatin husi postura deklarante sira nian.

Ida atu evita informasaun ka notísia sira ne’ebé laiha aneksu no husi sorin seluk sai nu’udar de’it notísia maibé laiha kontestu, serteza no seguransa ba públiku ne’ebé hakarak hatene lia loos.

Nune’e, Xefe Estadu enkoraja atu bele hasae formasaun jornalizmu hodi hala’o servisu informativu ho lia loos imparsiál tuir faktu no la hali'is ba grupu ka ema ho interese ruma.

“Ha’u preokupasaun makaas, iha Timor-Leste atu hasa’e formasaun jornalista sira nian”, tenik nia.

Liu husi deklarasaun Dili, Forum ne’e fó sai mós sira nia preokupasaun kona-ba informasaun bosok no lia falsu no buat ne’ebé bele satan hato’o informasaun loos ba públiku.

Tanba ne’e, Prezidente Repúblika hakarak bolu atensaun hotu-hotu nian ba média sosiál ne’ebé ema barak tebe-tebes maka uza, nu’udar fonte informasaun.

Meiu ida ne’e efetivu duni atu hato’o lalais liu notísia no opiniaun, maibé ikus mai ho interese ida-idak nian, mosu imajen no liafuan kro'at no aat tebe-tebes, iha rede sosiál, husi ema balun ne’ebé subar aan ho naran falsu.

“Ha’u preokupa tebe-tebes ho situasaun ida ne’e tanba lia bosok no falsu hatún ema nia dignidade, hakanek ita nia relasaun ba malu no hamate espíritu fahe matenek no hanoin hamutuk”, tenik Lú-Olo, liu husi nia mensajen.

Mensajen husi Xefe Estadu maka hotu-hotu atu haree hamutuk oinsá tulun malu, liu mós husi entidade reguladora independente ne’ebé sei harii tuir mai atu bele haforsa, monitoriza no proteje liu tan jornalista sira nia direitu atu espresa aan ho liberdade.

Nia akresenta, liberdade espresaun no liberdade imprensa hala’o daudaun ona iha Timor-Leste tanba Konstituisaun RDTL garante kedas. Nune’e, hamosu Lei Komunikasaun Sosiál ho harii Konsellu Imprensa, nu’udar órgaun independente atu regula komunikasaun sosiál.

Jornalista sira mós organiza aan ona, nu’udar Asosiasaun Jornalista Timor-Leste, Sindikatu Jornalista Timorenses no Timor-Leste Press Union. Baibain, la rona katak jornalista sira iha persegisaun polítika, ema baku ka oho, hanesan akontese iha rai sira seluk.

“Ita bele dehan katak ita iha ona imprensa livre katak jornalista sira la ta'uk denunsia krime no hahalok sala ruma husi mós ema boot sira ita iha jornalizmu sériu, onestu no rigorozu ona, ha’u husik hela pergunta sira ne’e, nu’udar pontu ba hotu-hotu hanoin kle'an,” akresenta nia.

Nia husu ba maluk Timor oan no belun sira, Biar la’ós fasil harii imprensa ida livre no Independente, Xefe Estadu ne’e fiar katak Asosiasaun jornalista sira nian no Konsellu Imprensa Timor-Leste nian ho apoiu Estadu Timor-Leste nian, sei book aan nafatin atu garante jornalista sira hato’o servisu informativu ho kualidade aas, lalais no independente.

Prezidente Repúblika fiar mós katak Estadu Timor-Leste sei habelar ba beibeik mekanizmu sira ne’ebé fó protesaun no seguransa ba jornalista sira, nu’udar sidadaun no profisionál ne’ebé informa, eduka no forma sidadaun responsavel, iha rai doben ida ne’e.