Tuir programa VIII governu nian ne’ebé aprezenta husi Primeiru Ministru, Taur Matan Ruak, Timor hanesan nasaun foun ida iha ne’ebé 50% husi populasaun maka ho otas 20 mai kraik.

Nune’e, ezije oportunidade hirak ne’ebé di’ak liu ba ensinu, formasaun, kapasitasaun no akizisaun koñesimentu ka kompeténsia hirak ne’ebé presiza ba implementasaun moris, ne’ebé ativa ba beibeik, produtiva no partisipativa liután ba dezenvolvimentu individuál ka koletivu nasaun nian.

“Ita labele tan kontinua ho situasaun atuál iha ne’ebé oportunidade servisu nian laiha, dezempregu buras tebes hodi obriga foin-sa’e sira sai ba rai-li’ur atu buka kondisaun moris nian ne’ebé di’ak liu,” dehan nia, iha aprezenta programa ba Parlamentu Nasionál, horisehik.

Tanba ne’e Primeiru Ministru ne’e deklara, Iha obrigasaun morál no devér atu hataan ba aspirasaun foin-sa’e sira nian, ho mensajen fiar no esperansa nian iha futuru, ho lema atu fó ba sidadaun ida-idak planu moris nian ida ho orientasaun ne’ebé klaru no akonsellamentu ne’ebé loloos kona-ba oportunidade oioin ne’ebé sira konsege, hodi fó apoiu, liuliu, inisiativa sira kona-ba empriendedorizmu kapasidade atu loke negósiu.

Nune’e, kria servisu ba-aan rasik ka auto-empregu sentru kriasaun empreza iha universidade sira no kandidatura sira ba fundu ka apoiu iha nivel nasionál ka internasionál.