Akordu ne’e halo relasiona ho apoiante Lu-Olo ho apoiante António da Conceição ‘Kalohan’ ataka malu iha Rai-Kotuk, Aldeia Terra Santa, iha loron primeiru kampaña eleisaun Prezidensiál, Sesta (3/3).
Hafoin akontesimentu, Komisaun Nasionál ba Eleisaun bolu kedas kandidatu husi parte rua iha Sabdu horsehik (4/3) hodi estabelese akordu atu hakribit violénsia durante kampaña.
Akordu ne’e hanesan komitimentu ida ne’ebé haktuir ba kódigu kondutas ba periudu eleisaun ne’ebé parte rua kondena ba aktu krime ne’ebé akontese no ambasas partes hakarak periudu eleisaun ne'e tenki la’o ho pás no dame
Prezidente Komisaun Nasionál ba Eleisaun, Alsino Barris husu ba Kandidatu Prezidente Repúblika hotu atu kontrola nia militante no simpatizante sira bainhira hala’o pawai labele hamosu fali violénsia no krime.
Kandidatu prezidenti, Antonio da Conceição ‘Kalohan’ hatete, Komisaun Nasionál ba Eleisaun bolu ona atensaun ba parte rua hodi estabelese akordu atu hakribit violénsia durante kampaña.
Tuir dadus insidente ne’e rezulta uma 36 hetan estragu no ema na’in rua kanek. Joven na’in rua ne’ebé kanek identifikadu ho naran Virgílio de Araújo (18) kanek iha rentós no Roberto Carlos das Neves (14) kanek iha parte ain-tuur.
