Prezidente CNE informa kestaun ne’e, relasiona ho apoiante kandidatura Prezidente Repúblika, Francisco Guterres ‘Lu-Olo’ ho apoiante António da Conceição ‘Kalohan’ ataka malu iha Rai-Kotuk, Aldeia Terra Santa, iha loron primeiru kampaña eleisaun Prezidensiál, Sesta (3/3).

Tuir dadus insidente ne’e rezulta uma 36 hetan estragu no ema na’in rua kanek. Joven na’in rua ne’ebé kanek identifikadu ho naran Virgílio de Araújo (18) kanek iha rentós no Roberto Carlos das Neves (14) kanek iha parte ain-tuur.

Ho problema ne’e, iha loron sabadu  CNE koopera ho PNTL,  no reprezentante kandidatu prezidente Lu-Olo no Calohan nian inklui reprezentante kandidatu seluk hala’o kedas enkontru emerjénsia iha CNE hodi buka solusaun.

Iha enkontru ne’e mós sira asina akordu komitimentu haktuir ba kódigu kondutas ba periudu eleisaun  ne’ebé parte rua kondena ba aktu krime ne’ebé akontese no ambasas partes hakarak periudu eleisaun ne'e tenki la’o ho pás no dame

Enretantu, Partido Demokratiku kondena makas konfrontasaun ne’e no ezije tenki halo investigasaun.

“Ha’u Hakarak dehan katak kondena maka’as ba violensia hot-hotu nudar Prezidente Partidu tenke kondena,” dehan Prezidente Partidu Demokratiku, Mariano Asanami Sabino, segunda horsehik, iha meeting  press, Hotel Vila Verde, Dili.

 Assanami lamenta hahalok ne’ebé lees panfletu husi kandidatura ida seluk nian ne’e krime tan ne’e tenke halo investigasaun.

“Ita labele tau liafuan, tenke pratika labele halo violensia, tenke kria pás  no estabilidade,”dehan nia.

Iha fatin hanesan, Prezidente Ekipa susesu kandidatura Kalohan, Arcangelo Leite hateten, sei kontinua investiga kazu konfrontasaun iha rai-kotu.

Iha parte seluk, Provedoria Direitus Humanus no Justisa (PDHJ) mós lamenta tebes ho kazu iha Rai-kotu ne’e.

Provedór  Direitus Humanus no Justisa Interinu, Horacio de Almeida hatete, konfrontu ne’e mosu mai husi ema sira ne’ebé tuir kampañia  eleitorál  ba kandidatura  Prezidente Republika.

“Kazu ne’e la’os responsablidade PNTL nian de’it maibé lidensa partidu no kandidatura sira para hato’o ba sira nia ema sira hodi haree ba situsaun ne’e hodi tuir kampaña ho kalma,”tenik nia.

PDHJ nia ekipa halo ona intervista ho komunidade vitima sira iha rai-kotu –Tasi Tolu hodi hatene klean atu halo relatoriu.

Tuir regra kampaña husi STAE, nia dehan, kandidatura ba PR ida atu halo kampañia eleitorál tenke konsentra iha fatin ida de’it atu kria establidade.