Prezidente Comissão Nacional Eleições (CNE), Alcino Barris hateten, durante kampaña eleitorál, laiha ema ida, autoridade ka instituisaun ida mak bele impede atividade kampaña, bainhira atividade ne’e la’o tuir prinsípiu lei no regulamentu ba kampaña nian.

“Ema ne'ebé impede ema seluk ezerse nia direitu atu halo propaganda eleitorál halo destruisaun ilejítima ba propaganda eleitorál sei hetan pena prizaun to’o tinan rua ka multa,” dehan nia, iha Salaun CNE, Kaikoli-Dili, horisehik.

Tanba ne’e, CNE apela ba kandidatura sira ne'ebé sente afetadu ba sira nia diretu durante kampaña eleitorál bele hato’o keixa mai CNE.

CNE iha kompeténsia hodi foti medida nune’e bele garantia kumprimentu no dezenvolvimentu pasifika ba kampaña eleitorál.

Prosedimentu Kampaña Eleitorál

Entretantu prosedimentu kampaña eleitorál nian ne'ebé iha ona hanesan atividade direta ka indireta hodi promove kandidatura liu husi materiál propaganda.

Tanba ne’e, kandidatu sira rezigna sira nia responsavel ba kampaña eleitorál antes kampaña hahú.

Responsabilidade sira nia knaar mak garantia kumprimenta ba regulamentu no mós asegura kontakta ho autoridade eleitorál sivíl no polisia.

Alende ne’e, responsavel ba kampaña eleitorál mós tenke aprezenta kalendáriu kampaña eleitorál mai CNE ho antesedénsia oras 72.

Nia dehan, sira ne'ebé organiza atividade kampaña mós ho antesedénsia 72 ne’e, informa ba autoridade administrativa no polisia relasiona ho oráriu, fatin, oras ba realizasaun kampaña eleitorál.

Tanba ne’e, tuir autoridade sivíl no polisia sira fatin sira koordena ho responsavel ba kampaña hodi evita koinsidénsia ba atividade kampaña.