Husi totál motorizada ne’e maioria kontra regra tránzitu no balun uza kanu racing.

Segundu Komandu PNTL Munisípiu Dili, Superintendente Asistente Euclides Belo hateten, Komandu PNTL koloka membru sira halo operasaun iha parte Rotunda Komoro hodi halo cheek point.

Prinsípiu husi operasaun ne’e atu buka motór sira ne’ebé uza kanu racing hodi halo barullu iha Dili laran hodi provoka situasaun.

“Ami PNTL Dili hetan apoiu husi Unidade Espesiál Polisia (UEP) hamutuk Tránzitu Nasionál prende motór hamutuk 199, inklui kanu racing 48”, dehan Euclides, edifísiu iha Komandu PNTL Munisípiu Dili-Kaikoli, horisehik.

Nia hatutan, bainhira PNTL halo operasaun ba motór sira, maioria apoiante sira halo asaun agresivu hasoru PNTL, maibé Polisia mós la hakfodak ho situasaun ne’e rasik no konsege prende motór sira ne’e.

“Ami prende de'it maka motór sira. Maibé atributu partidu ho kandidatura nian ami entrega didi'ak ba militante sira”, katak Euclides.

Nia esplika, operasaun ne’ebé Polisia sira halo iha área rotunda Komoro ho Tasi-Tolu bainhira militante sira hamutuk ho kandidatura númeru daruak bainhira husi Likisá dezloka mai Dili.

Tanba ne’e, Euclides haktuir, PNTL sei aplika tuir lei tránzitu ne’ebé daudaun ne’e iha ona hodi selu bazeia ba tabela infrasaun.