Deputadu parlamentu nasionál sira kestiona katak, agora daudaun juis na’in lima, inklui mós Deolindo sei iha prosesu avaliasaun hodi sa’e husi segundu ba primeira klase.
Ne’e duni, bainhira Prezidente Tribunál Rekursu foun ne’ebé Xefe Estadu nomeia la pasa ba primeira klase, nia tenke entrega fila-fali kargu ne’e.
Deputada Bankada CNRT, Carmelita Monís hateten, tuir estatutu majistratura judisiál, iha avaliasaun mak la hetan valór di’ak, kargu ne'ebé nia simu ona tenke entrega.
“Tuir estatutu judisiáriu nian prezidente tribunál rekursu tenke iha avaliasaun valór bom ka muito bom, tanba atu pasa ba primeiru klase tenke hetan valór bom ka muito bom, valór sufisiente de’it la pasa ba primeira klase”, dehan Carmelita, iha Uma Fukun PN, horisehik.
Nia dehan, nomeasaun PTR ne’e kompeténsia eskluziva Presidente Repúblika nian, maibé inspesaun avaliasaun ba juis sira mós sei la’o hela agora.
Ne’e duni, atu pasa ba primeira klase, sira tenke atinje valór mínimu bom, atu hili sira sai juis konselleiru iha tribunál rekursu. Juis sira ne’e Presidente Repúblika bele hili ida sai ba Presidente Tribunál Rekursu.
Tuir nia hanoin, loloos prezidente repúblika bele aguenta uitoan tan hodi hein rezultadu avaliasaun ne’ebé sei haruka ba Konsellu Majistratura no aprezenta mós ba Prezidente Repúblika. Husi rezultadu ne’e mak foin halo nomeasaun.
“Ha’u espera katak nomeasaun ne'ebé Prezidente Repúblika halo ona ne’e la sala, tanba ne’e ita sei servisu hamutuk hodi haforsa ita nia sistema judisiáriu iha Timor-Leste”, dehan Carmelita.
Nia hatutan, nomeasaun ba PTR foun ne'ebé halo iha ultima mandatu, iha tendénsia balun ne'ebé mosu, maibé entrega ba públiku no povu rasik mak bele lee no tetu prosesu sira ne’e.
“(Guilhermino) nia saúde uluk kedas, nusa la rezigna aan antes kedas atu nune’e Prezidente Repúblika bele tetu no haree didi'ak atu pelumenus Xefe Estadu ne’e bele rona mós ema seluk nia ideia uitoan”, tenik nia.
Tuir Carmelita, kooperasaun entre órgaun soberania sira ne'ebé di'ak, tenke rona ema seluk hodi tetu hanoin sira hafoin halo desizaun, bainhira hakarak mellora prosesu sira hodi hetan nia rezultadu di'ak.
Iha fatin hanesan, Deputadu Bankada CNRT, Arão Noe de Jesus hatete, nomeasaun ba superiór órgaun sira ne'ebé importante, di'ak liu hein prezidente foun mak bele halo substituisaun atu bele asegura sistema servisu ho di'ak.
PTR Simu Pose iha Sesta
Prezidente Repúblika aprova ona pedidu rezignasaun ne’ebé Prezidente Tribunál Rekursu, Juis Guilhermino Silva, hato’o tanba razaun saúde.
Iha okaziaun ne’e, Prezidente Repúblika hato’o obrigadu ba serbisu ne’ebé Prezidente Tribunál Rekursu hala’o durante ninia mandatu hodi defende podér judisiál nia independénsia, promove juis sira-nia kondisaun profisionál no hasa’e Tribunál sira-nia kualidade, liuliu kualidade desizaun judisiál sira-nian.
Tribunál Rekursu hanesan instánsia judisiál boot liu Timor nian, ne’ebé kaer kompeténsia importante tebes hirak hodi fiskaliza konstitusionalidade lei sira-nian, foti desizaun kona-ba kazu judisiál hirak ne’ebé importante, balun inklui arguidu detidu ho natureza urjente no, tinan ida-ne’e, Tribunál Rekursu kaer hela kompeténsia lubuk ida ne’ebé fundamentál tebes relasiona ho prosesu eleisaun, tanba ne’e mak importante asegura ninia lala’ok regulár.
Prezidente Repúblika, Taur Matan Ruak, nomeia ona Juis Deolindo dos Santos ba hala’o knaar nu’udar Prezidente Tribunál Rekursu.
Prezidente Tribunál Rekursu foun ne’e lisensiadu husi Fakuldade Direitu Universidade Pattimura, Ambon, indonézia.
Nia hahú nia karreira nu’udar majistradu judisiál iha tinan 2000 no iha tinan 2011 kedas hetan nomeasaun ba Tribunál Rekursu.
