Xefe Estadu Maiór Jenerál F-FDTL, Majór Jenerál Lere Anan Timur hateten, kazu ne’ebé akontese iha Oekusi nia grau ne’e todan uitoan, tanba ne’e komandu foti ona desizaun hodi demite membru na’in rua ho diviza alferes no sarjentu.

“Kazu Oekusi nian ne’e ita haruka sai”, dehan nia, iha Palasiu Prezidente Repúblika, Ai-Tarak Laran, horisehik.

Nia esplika, nu’udar ema edukadu loloos problema ne’e tenke rezolve ho ulun malirin, la’ós ho violénsia.

“Ita matenek ne’e, ho matenek mak rezolve problema, la'ós ho forsa mak rezolve problema”, dehan nia.

Komandante F-FDTL ne’e hateten membru sira ne’ebé uza kilat rezolve problema hatudu katak sira la hadomi ona instituisaun no tenke hasees ona sira.

Ne’e duni, nia dehan, kuandu la gosta ona instituisaun di'ak liu husik tiha tanba la hadomi instituisaun rasik.