Revizaun ne’e iha koordenasaun servisu entre Ministériu Estadu Koordenadór Asuntu Ekonomia (MEKAE) ho Sekretáriu Estadu Polítika Formasaun Profisionál Empregu (SEPFOPE).
Revizaun ne’e halo hafoin tinan haat ka iha 2012 determina ona saláriu mínimu husi $85 sa'e ba $115. Tuir planu iha tinan ne’e atu hasa’e tan ba $150.
Prezidente Konfederasaun Sindikatu Traballadór Timor-Leste (KSTL), José da Conceição hateten, tuir lei loloos iha 2014 halo ona revizaun, maibé dada nafatin to’o 2017 mak foin iha konkordánsia ba malu.
Ante ne’e, KSTL aprezenta iha tinan kotuk, saláriu mínimu ne’e $200, maibé Kámara Komérsiu Indústria Timor-Leste (CCI-TL) husu hamenus ba $150 to’o $170. Tanba ne’e governu bolu parte sira ne’e hotu hodi diskute hamutuk.
“Tripartida tuur hamutuk hodi diskute fali hodi propoin $150”, dehan José, iha Delta-Nova, horisehik.
Iha fatin hanesan, Sekretáriu Estadu Ilídio da Costa Ximenes hatete, revizaun saláriu mínimu diskute ona, atu haree hela de’it 15%. MEKAE hein atu lori ba Konsellu Ministru atu hetan aprovasaun.
Kona-ba atu hasae saláriu, nia dehan, Konsellu Ministru mak bele hatene, tanba lia ne'ebé mai husi KSTL no CCI-TL sei haree avansa ho persentajen hira.
Tanba ko'alia kona-ba atu hasae saláriu tenke haree mós ba impaktu no indústria iha Timor laran ne’e iha ka lae.
