Kompañia Gota durante ne’e la halo teste bee iha laboratóriu Ministériu Saúde nian tanba halo ona teste iha SAS.
Diretór Ezekutivu Kompañia GOTA, Nilton Gusmão, sente hakfodak bainhira husi laboratóriu Hospital Nasionál Guido valadares (HNGV) fó informasaun kona-ba kualidade bee Gota iha média.
“Kompañia la’ós la tuir kritériu estadu ou la ba halo teste iha laboratóriu saúde, maibé kompañia Gota tinan-tinan ba halo teste iha laboratóriu SAS nian,” dehan nia, iha ninia servisu fatin, Hudi-Laran, Fatuhada, horisehik.
Nia esplika, kualidade ne’e kestaun importante tanba ne’e sira garante nafatin kualidade hodi proteje konsumidór sira.
Ne’e duni, tuir nia, informasaun ne'ebé publika parte ospitál fó sai iha média la loos. Tanba maioria kliente Gota nian ema estranjeiru ne’ebé sente no hatene kona-ba kualidade bee nian.
Dezde 2013 kompañia ne’e harii sempre halo teste iha laboratóriu SAS nian ne’ebé ninia ekipamentu doasaun husi World Health Program (WHO), maibé to’o ohin loron seidauk identifika impaktu ruma husi konsumu bee Gota.
Ne’e duni SAS nu’udar instituisaun ne’ebé tutela ba asuntu bee bele garante kualidade ne'ebé bele tuir kualidade estandarte bee hemu nian.
Nia mós esplika, bainhira kompañia Gota hamriik, sira halo kontakta ba Ministériu Saúde atu halo teste, maibé sira laiha ekipamentu atu halo teste ba bee iha momentu ne’ebá, entaun deside hodi teste iha SAS.
