Ba kestaun ida ne’e, Partidu Sosial Demokrata (PSD) ne’ebé iha periodu 2012-2017 la hetan asentu iha Parlamentu Nasionál, konsidera bareira 4% ne’e anti demokrasia.

Prezidente PDS, João Goncalves konsidera alterasaun ne’e la fó espasu no prezudika partidu kiik sira.

“Maibé ha’u bele dehan katak, ami, PSD, fiar metin katak ami bele liu bareira 4% ida ne’e,” dehan Prezidente PSD ne’e ba jornalista sira iha Akait-Dili, Sabadu (18/02).

Maske konsidera taka dalan ba partidu kiik sira, maibé João dehan, iha parte seluk mós tanba TL nasaun kiik no ho númeru populasaun ne’ebé uitoan, maibé partidu politiku barak demais.

“Dala ruma ita hatene katak to’o ona ba eleisaun lejislativa paratidu lubuk ida hein para simu subsidiu kampaña, maibé ikus mai sira la halo kampaña ida, tanba uluk ha’u rasik mak la’o ba kampaña iha fatin-fatin ha’u hare’e katak partidu barak mak la tun ba iha baze hodi hala’o sira nia kampaña,” deklara nia.

Maske nune’e, nia hein katak bainhira Lei ne’e to’o iha Prezidente Repúblika Taur Matan Ruak nia liman, PR Taur bele haree no estuda didi’ak molok promulga.

“Lei ne’e sei ba to’o iha Prezidente (Repúblika) no Prezidente sei konsidera katak se lei ne’e halo diskriminasaun ruma ba partidu ki’ik ka lae ou lei ne’e anti demokratiku ka lae. Karik Prezidente hanoin ou iha preokupasaun ruma bele haruka ba iha Tribunal Rekursu hodi husu fiskalizasaun preventiva ba lei ida ne’e,” dehan João.