Diresaun Jurídiku partidu CNRT, Carmelita Moniz hatete, akta apuramentu munisípiu iha momentu ne’ebá fiskais husi partidu seluk asina, maibé partidu CNRT no partidu seluk balun mós verbalmente la asina tanba duvida hela ho rezultadu kontajen votu.

“Ami nia fiskais rekuzadu, la asina akta apuramentu Munisípiu Dili nian tanba iha momentu ne’e laiha ofisiais husi STAE nian para atu esplikasaun ba ami nia fiskais kona-ba téknika apuramentu nian”, dehan nia, iha salaun CNE, horisehik.

Dalan Nakloke Atu Lori Ba Tribunál

Hataan ba kestaun ne’e, Prezidente CNE, Alcino de Araújo Barris hatete, akta apuramentu husi sentru votasaun ka mai to’o nasionál lei la haruka fiskais hotu-hotu tenke asina, maibé fikais sira ne'ebé marka prezensa bele asina.

Nia hatutan, akta apuramentu Munisípiu Dili nian fiskais husi partidu polítiku balun asina, maibé sira ne'ebé la asina ne’e nia direitu. Ne’e hanesan kontestasaun bele aprofunda ho razaun tanba saida la asina akta ne’e.

Nia hatutan, ba partidu polítiku sira ne'ebé lakohi asina akta apuramentu ne’e bele lori ba tribunál, maibé ba iha ne'ebá tenke hatudu faktu para bele koloka tuir razaun saida mak lakohi asina akta apuramentu atu Tribunál bele halo desizaun.

“Ba partidu polítiku sira ne'ebé la asina akta ne’e laiha efeitu ba prosesu apuramentu nasionál. Tanba, apuramentu nasionál tuir lei legalizasaun, ami órgaun independente tuir paktu ne'ebé ami legaliza dalan nakloke ba ema hotu-hotu atu lori ba tribunál, tanba ne’e ultima instánsia”, dehan nia.

Nia hatutan, rezultadu ne'ebé iha gosta ka lae labele politiza, tanba ne’e atu lori ba tribunál tenke hatudu faktu atu polítika la tama iha ne'ebá.