Prizioneiru ne’e Polisia Servisu Investigasaun Kriminál (PSIK) foti iha ninia uma ho karreta operasaun PSIK iha tuku 09:21, hodi kontinua aprezenta ba komandu Munisipál Dili no to’o iha prizaun Bekora iha tuku 10:25 ho karreta modelu pick-up ho xapa matríkula 02-922 G.
Mandatu kapturasaun hasai husi Tribunál Distritál Dili (TDD), iha Tersa (25/7), tuku 15:30 no despaxu ne’e to’o iha polisia nia liman iha tuku 17:00. Maski nune’e, tuir observasaun diáriu ne’e, to’o kalan atividade iha kondenadu nia hakmatek no laiha movimentu ruma. Nia mós la toba iha uma kalan ne’e.
Nune’e, kondenadu foin tama uma, iha Kuarta (26/9), tuku 07:15 no polisia sira hakat ba hodi ezekuta mandadu kapturasaun iha tuku 09:21.
Bainhira to’o iha prizaun, João Câncio hodi ninia-lima taka metin ninia oin. kondenadu ne’e tama prizaun uza xinelus, faru mutin no kalsa naruk jeans kór malahuk.
“Oras ne’e daudaun João Câncio iha hela Prizaun Bekora”, dehan Diretór Prizaun Bekora, João Domingos, iha ninia-servisu fatin, horisehik.
João Câncio Freitas, kondena tama kadeia tinan 4 fulan 6, tanba envolve kazu administrasaun danoza ba projetu Televizaun Edukasaun, ne’ebé sai objetu ba nia prosesu legál dezde 2012 liubá.
Tribunál Rekursu mós hatún ona desizaun atu João Câncio tenke selu indenizasaun ba Estadu ho montante $1.410.000, inklui taxa judisiál hamutuk $200.
Hasai Identidade iha iha Komandu PNTL
Eis Ministru Edukasaun, kondenadu João Câncio Freitas halo aprezentasaun iha Komandu Polisia Nasionál Timor Leste (PNTL) Munisípiu Dili hodi hasai retratu no presta deklarasaun kona-ba desizaun husi Tribunál hasoru nia.
Komandante Jerál PNTL, Komisáriu Júlio da Costa Hornay hatete, PNTL hala’o knaar tanba simu orientasaun husi Tribunál hodi presta deklarasaun molok tama ba prizaun.
Nia esplika, kondenadu ne’ebé Tribunál deside tama prizaun tenke presta deklarasaun identidade nian no hasai fotografia hodi entrega hikas dokumentu sira ne’e ba tribunál.
Tanba ne’e, PNTL ezekuta ona orden no relata ba tribunál sobre relatóriu ne’ebé halo ba eis-ministru edukasaun ne’e.
