Tuir kronolojia, iha Kuarta (22/2) semana kotuk, iha Munisípiu Kovalima, iha meiudia matebian ba halo toos. Tanba sente hamrook matebian ba husu bee hemu iha ninia ferik-oan nia biin hodi hemu.

Hafoin ida ne’e, matebian nia kuñada ne’e fila ba uma no keixa ba nia la'en ho nia maun sira katak matebian husu númeru telemovel.

Rona tiha ida ne’e, matebian nia ferik-oan tuir matebian ba toos hodi husu tuir tanba saida mak husu ninia biin nia númeru telemovel.

Matebian sente hakfodak bainhira rona novidade ne’e. Too iha uma matebian mós simu basa husi nia kuñada no kuñadu sira.

Nune’e, iha Kinta (23/2), matebian buka ai-moruk pestisida (rega hare) hodi hemu no ikus mai labele salva ninia vida.

“Nia hemu ai-moruk ne’e iha kinta dadeer. Tanba nia moe maka hemu ai-moruk ne’e,” dehan matebian nia feen, Angelita de Araújo, iha HNGV, foin lalais.

Hafoin matebian hemu ai-moruk ne’e família lori kedas ba Ospitál Referal Suai no konsege baixa kalan rua matebian hakotu nia iis. Nune’e iha Domingu família lori mai mate isin mai iha Hospital Nasionál Guido Valadares (HNGV) hodi halo autópsia.

Prosesu autópsia konsege halo iha Segunda (27/2) no Tersa (28/2) mate isin entrega fali ba família sira hodi halo prosesu funerál.

Iha fatin hanesan, forensik HNGV Frederico Loka Abi hatete, mate isin husi Kovalima ne’e seidauk identifika loloos kona-ba motivu venenu ne’e, tanba complain uitoan ho ai-moruk rega duut nian.

Husi autópsia ne’e identifika duni venenu. Antes lori matebian mai iha HNGV iha Ospitál Suai venenu domina liu soru. Tanba ne’e, matebian lori mai ekipa médiku sira sei halo ezame kona-ba ai-moruk venenu.

Klaru liu kazu ne’e sei entrega ba prosesu investigasaun mak foin bele identifika loloos kazu ne’e.