Jenerál Lere dehan, atu tama ba eleisaun no kampaña partidu polítiku ba lider polítiku no komunidade no joven hotu tenke mantein dixiplina no responsabilidade iha servisu boot ne’e.

Nia dehan, ba partidu polítiku sira ne'ebé iha relasaun emosionál ho arte-marsiál keta kria konflitu iha eleisaun jerál ne'ebé atu akontese iha tinan ne’e.

“Ami hatene iha iha grupu arte-marsiál balu ne'ebé daudaun ne’e harii ona partidu polítiku,” dehan Lere iha Kuartél Jerál PNTL, Kaikoli, horisehik.

Nia dehan, oras ne’e daudaun partidu polítiku balun barak iha relasiona ho arte-marsiál. Tanba ne’e, keta envolve halo krime hodi sobu estabilidade nasaun nian iha époka ne’e.

Lere hataan kestaun ne’e tanba lider arte-marsiál balun forma ona partidu polítiku hodi kompete iha eleisaun parlamentár hodi hetan asentu iha parlamentu hodi ukun nasaun ne’e.

Lere konsidera, lider partidu polítiku ho lider arte-marsiál labele halo relasaun emosionál hodi haforsa atividade partidu nian bainhira iha kampaña eleisaun jerál nian.

Tanba ne’e, Lere husu ba lider partidu polítiku ho lider arte-marsiál keta konfia membru arte-marsiál sira sai hanesan instrumentu ba forsa ba partidu partidu nian.

Lere afirma, iha nasaun ida ezisténsia forsa iha PNTL ho F-FDTL de'it no laiha instituisaun forsa seluk hodi hodi halo fali atividade seguransa iha rai laran.

Tanba ne’e, apela ba sidadaun timoroan tomak apoiu ba F-FDTL ho PNTL hodi halo seguransa ba eleisaun jerál ho kampaña prezidensiál ho kampaña eleitorál atu povu tomak moris ho pás no estabilidade.