Tuir família pasiente, Abílio da Costa hateten, inan ne’e baixa iha HNGV semana tolu ona tanba raan menus, maibé raan rezerva ho tipu B laiha atu fó apoiu ba inan ne’e.

“Ha’u mós bolu ha’u nia kolega no família sira mai hasai sira nia raan, maibé raan sira ne’e la hanesan hotu”, dehan nia, iha HNGV Bidau, horisehik.

Nia dehan, moras seluk laiha, maibé raan menus maka mai halo tratamentu. Médiku sira mós haruka buka lalais ema hodi ajuda raan ba nia-inan.

Entretantu, iha fatin hanesan Xefe Banku Sangue HNGV Gilberto Madeira hatete, agora daudauk ne’e raan rezerva ho Tipu B iha hela, maibé fó ona ba pasiente ne’e.

“Ami nia regra ne’e kada pasiente ida nia iha diretu atu simu raan plástiku rua (2). Tuir mai, haruka nia família maka apoiu ona”, tenik nia.

Karik pasiente ne'ebé simu ona raan ne’e HNGV sei la fó tan ona apoiu. Maski agora daudauk raan rezerva sei kompletu hela hamutuk plástiku 60 no tipu raan B iha plástiku 24.

Alende ne’e, Xefe Parteira, Sara Maria Xavier hateten, pasiente ne’e ho moras raan fakar no anemia grave. Nune’e, pasiente ne’e hetan ona ai-moruk aumenta raan no doasaun raan.

Nia dehan, raan plástiku ida maka konsege fó duni ba pasiente ne’e. Nune’e, pesoál saúde sira konfirma ona ba banku de sange maibé dehan raan rezerva tipu B laiha ona. Tanba ne’e, husu família sira atu bele fó apoiu.

Tratamentu ne’ebé oras ne’e daudaun pesoál saúde sira fó mak fó ai-moruk multi-vitamina no aumenta raan nian.