Xefe Estadu Maiór Jenerál FALINTIL Forsa Defeza Timor Leste (F-FDTL) Majór Jenerál Lere Anan Timur kondena makaas aktu ne’e.

Tanba nee Lere husu ba timoroan hotu ne’ebé mak uluk lakohi ukun-aan atu labele insulta no difama lider rezisténsia sira iha facebook ka Média sosiál.

Lider másimu forsa armada ne'e mos ameasa katak, bainhira la hapara hahalok sira ne’e, sei atua fora husi lei.

“ohin loron,  timoroan balun la respeita no la signifika ona lider istóriku sira nia esforsu no  matenek ne’ebé halo Timor Leste  ukun aan. Hanesan karikatura ka foto sira, ezemplu hanesan Primeiru Ministru Taur Matan Ruak nian tau tali iha kakorok, hanesan mós uluk Prezidente Repúblika Lú Olo,  Xanana, Ramos Horta no Alkatiri. Ida ne’e ha’u dehan katak laiha edukasaun no morál”.

Lere ko'alia asuntu ne’e, hafoin  enkontru semanál ho Prezidente Repúblika Francisco Guterres Lu Olo iha palasiu Prezidensiál Nicolau Lobato Bairru Pité Dili.

Kona ba kestaun polítika, Lere hateten, ema sira ne’ebé halo ida ne’e, dala ruma uluk lakohi ukun aan.

Tanba ne’e, Lere husu ba  Tribunál tenke kriminaliza, no nu’udar elementu seguransa ida nian,  aban bain rua toman ema sira hanesan ne’e, Lere atua fora husi lei.

Tanba buat ne'ebé ema halo iha média social sempre halo ba  lider Rezisténsia Libertasaun Nasionál no nunka halo ba ema seluk.

Antes ne’e, deputadu sira iha Parlamentu Nasionál mos kestiona makaas kona ba asuntu ne’e.