Lere: Forsa Armada Hatais Farda Labele Book Featured

By Cristina Ximenes Outubru 12, 2018 8760
 Maijór Jenerál Lere Anan Timur Maijór Jenerál Lere Anan Timur

DILI: Xefe Estadu Maiór FALINTIL Forsa Defeza Timor Leste (F-FDTL) Maijór Jenerál Lere Anan Timur husu ba públiku, liu-liu joven sira atu labele book membru forsa armada bainhira sira hala’o hela sira-nia servisu.

Deklarasaun ne’e Maijor Lere hato’o relasiona ho deklarasaun husi familia, Martinho Gama (20), ne’ebé deskonfia pesoal F-FDTL tiru mate iha area Buigira, Postu Laga, Munisipiu Baukau iha 5 Outubru liu ba.Enkuantu, Martinho nia mate-isin hetan iha loron 6 Outubru iha área tasi-ibun.

Maske familia duun pesoal F-FDTL mak tiru, maibé familia lakohi atu koopera ho PNTL hodi halo autopsia ba mate-isin. Família hakoi ona mate-isin iha loron 9 Outubru.

Tuir informasaun, hafoin asalta refere, membru F-FDTL konsege kaer ema na’in hitu (7) ne’ebé deskonfia halo asalta ba delegasaun F-FDTL no família ne’ebé tula mate-isin veteranu F-FDTL ida.

Ba kazu ne’e, Lere dehan, membru forsa defeza bainhira armada hodi ba fatin ruma no ema ataka, nia iha direitu atu halo ninia auto-defeza.

Tan ne’e, Maijor Lere husu ba joven sira atu labele provoka demais forsa armada sira bainhira sira hala’o hela sira-nia misaun.

“Bainhira joven sira mak hemu tua lanu, baku malu iha ne’ebé de’it, ne’e problema imi nian. Maibé bainhira forsa armada hatais farad, labele book. Agora (kazu ne’e) ba Tribunál mak sei tesi (membru) forsa armada (mak) sala ka joven sira mak sala,” deklara Lere ba jornalista sira hafoin hasoru-malu ho Prezidente Repúblika Francisco Guterres Lu Olo iha palasiu prezidensial Nicolau Lobato, Bairru-pite, Kuarta (10/10).

“Ha’u hanoin katak (kazu) Laga nia prosesu la’o hela. Forsa sira mak sala ka ha’u-nia oan sira iha Laga ne’e mak sala. Ha’u-nia oan sira ne’eba la’os ema seluk no ema leet, dala-ruma sira-nia aman sira mós terus ba funu ida ne’e, ne’ebé agora ha’u la kondena ema ida, se forsa sala, tuir lei,” tenik Lere.

Molok ne’e, Komandante Eskuadra PNTL Postu Administrativu Laga, Primeiru Sarjentu Duarte Ximenes  informa, iha 5 Outubru tuku 1o kalan, joven sira halo asalta bainhira ekipa F-FDTL no família sira ho karreta no motór lori mate-isin husi Dili atu ba iha Laivai, MunisipiuLautem.  

Iha akontesimentu ne’e rezulta karreta no motór balun hetan estragu hafoin hetan tuda husi joven sira.

Kona-ba joven ne’ebé mate, nia dehan, família husi vitima deskonfia iha pesoal F-FDTL mak tiru. Maibé to’o agora PNTL seidauk hetan evidensia klaru.

Hafoin akontesimentu ne’e, nia hatutan, parte PNTL no F-FDTL to’o kedan iha fatin akontesimentu hodi husu informasaun ba Xefe Suku Nunira, Laga, Nilton Gama, maibé autoridade ne’e rezeita fó informasaun ba parte seguransa.

Ba na’in hitu ne’ebé hetan kaer, nia hatete, entrega ona ba Polisia Eskuadra Laga hodi halo investigasaun.

Entretantu, polisia husu mós atu halo autopsia ba matebian Martinho, maibé família lakohi koopera.

“(familia) Sira lakohi entrega mate-isin ba ami (polisia). Maibé sira deskonfia nafatin katak matebian Martinho nia mate ne’e forsa mak oho. Oinsá ita bele dehan ne’e forsa mak oho kuandu la halo autópsia?,” Komandante ne'e kestiona.

Daudauk ne’e, nia hatutan, PNTL no autoridade sira halo aprosimasaun ho família atu bele entrega mate-isin hodi bele justifika lia loos.

Bainhira familia lakohi nafatin atu koopera, Duarte dehan, polisia labele atu lori prosesu ne’e ba oin tanba laiha faktu no evidénsia ne’ebé bele indika.

Rate this item
(0 votes)

Independente Digital TV