Iha konferensia internasional ne’e partisipa husi peritus Internasional sira husi Portugal, Kabo-verde, Indonezia no Nova Zelandia.

Konferensia ho tema ‘Komprimisu Parlamentu no Kombate Korupsaun’ ne’e hala’o durante loron rua iha salaun nobre Ministériu Negosiu Estranjeiru.

Prezidente Parlamentu Nasionál Aderito Hugo hatete, projetu Lei Anti Korupsaun ne’e prepara husi Banka Fretilin, CNRT, Frente-Mudansa no PD.

Tuir nia, konferensia internasional ne’e hanesan pasu ultimu husi inisiativa projetu Lei Anti Korrupsaun.

Nia dehan, dezde II Lejislatura halo ona diskusaun naruk teb-tebes no prosesu ne’e aprezenta hanesan projetu lei husi deputadu sira.

“Kualker lejislasaun ne’ebé ita halo tenke bazeia ba prinsipiun fundamental sira iha ita-nia Konstituisaun ka Lei Inan,” dehan nia.

Tanba, bainhira la tau konsiderasaun ba prinsipiu fundamental sira tuir Konstituisaun define, labele vigora tanba bele kontrariu ho prinsipiu fundamental sira iha Konstituisaun.

Iha fatin hanesan, Prezidente GOPAC Francisco Miranda Branco konsidera korupsaun hanesan virus ida ne’ebé ameasa mundu no bele ameasa TL, tanba ne’e presiza luta hasoru virus ida ne’e.

“Nune’e loron runa ita bele manan hanesan iha tempu uluk ita luta hasoru kolonial hodi manan ita-nia independensia,” dehan Branco. 

Nia dehan, envolvimentu husi sosiedade sivil no organisasaun sira importante tebes hodi luta kontra aktu korrupsaun iha TL.

“Ami bolu atu ita hamutuk hodi luta hasoru korupsaun, hahú husi organisaun sosiedade sivil, rede universidade sira, juventude parlamentar, ONG sira par ita hamutuk iha liña ida hodi luta hasoru korupsaun,” dehan Branco iha nia deskursu.