“Ami nia konsentrasaun durante semana rua nia-laran bele aprova metade husi artigu 100-resin ne’e, foin mak aprova artigu 22, agora sei hela artigu 90-resin,” dehan nia, iha PN, horisehik.

Deputada Joaquim dehan, komisaun deside ona sei halo kontinuasaun diskusaun LAK iha Munisípiu Manufahi, tanba iha Dili ladún iha konsentrasaun.

“Desizaun Komisaun A ne’e hakarak ba uluk Same. Iha ne’ebá fatin balun fresku hodi deputadu sira diskute kada artigu, depois semana tuir-mai mak eskolla fali fatin seluk,” dehan nia.

Nia hatutan, iha artigu balun sei halo diskusaun iha Dili, maibé presiza eskolla munisípiu hodi fó konsentrasaun másimu. Debate ne’e nakloke ba públiku, instituisaun ne’ebé interesante bele partisipa hodi akompaña.

Prezidente Komisaun A ne’e sei aprezenta karta ba Prezidente Parlamentu Nasionál katak, membru komisaun eskolla kapitál Same, sai hanesan diskusaun kontinuasaun ba Lei Anti Korrupsaun.

Nia akresenta, Lei korrupsaun ninia dimensaun maka orienta sidadaun sira moris tuir ninia kapasidade no moris tuir nia hakarak ne’ebé di'ak, hodi labele fó todan ba ema seluk liga ba estadu.

Dimensaun morál, tanba lei tenke orienta ema dimensaun sósiu-ekonómiku no polítiku, tanba ne’e lei anti korrupsaun tenke orienta ema moris iha dixiplina, iha nia komportamentu. Nune’e, dimensaun jurídika, lei ne’e bele prevene ema labele halo sala.