Xefe Suku Bemori Cristalina Soares Pereira de Oliveira deklara la kontente ho asaun entre feto na’in rua iha PN.

“Nu’udar feto ne’ebé hetan konfiansa sai autoridade lokal ami sente ida ne’e imajen ne’ebé la di’ak ba ita, povu tomak. Sai nu’udar inan ida mak tuur iha uma fukun (PN) maibé sira fó ezemplu ne’ebé la di’ak ba ami, liu-liu feto ne’ebé servi komunidade iha baze,” dehan nia ba jornalista INDEPENDENTE iha Sede Suku Bemori, Kinta (18/06).

Tuir nia, nu’udar feto ne’ebé tuur iha PN, loloos deputada na’in rua ne’e tenke hatudu ezemplu ne’ebé di’ak, koalia ho maneira ne’ebé di’ak no respeita malu hodi hatudu imajen di’ak feto Timor-Leste ba mundu.

Iha fatin ketak, peskizadór Fundasaun Mahein (FM) Sancho Xavier hatete, aktu deputada na’in rua iha PN nu’udar aktu brutalizmu.

Nia dehan, membru PN sira laos reprezenta partidu politiku maibé reprezenta povu, tanba ne’e tenke respeita aspirasaun povu hodi hatudu maturidade politika no integridade pesoal.

Entretantu, Reitór Universidade da Paz (UNPAZ) Adolmando Amaral reprezenta povu sira iha PN tenke hatene katak fatin ne’ebá atu deskute povu nia nesesida no interese nasaun nian, laos ba halo agresaun fiziku.

“Deputadu sira daudaun konsidera fali fatin ne’ebá (PN) atu halo agresaun fizika, hanoin hahalok demostrasaun ne’ebe hatudu fulan ikus, ne’e la edukativu,” dehan Adolmando.

Reitór ne’e mós la konkorda ho deputada Olinda Guterres ne’ebé kritika deputada Fernanda Lay tanba uza lian portages iha plenaria PN.

“Deputadu buka ajusta an, laos mai halo protesta fali, ne’e laos solusaun, presiza kapasita aan, diskusaun iha planearia tantu portugues no tetun buka entende di’ak,” nia hatete.

Entretantu, iha Kuarta (17/06) deputada na’in rua husi bankada KHUNTO no CNRT “rakut-malu” iha PN tanba problema lian portugues.

Kazu entre deputada bankada KHUNTO Olinda Guterres ho deputada Bankada CNRT Fernanda Lay akontese bainhira deputada Fernanda Lay ko'alia lian portuges ba governu relasiona ho audensia publiku iha plenaria Parlamentu Nasional.

"Ami la hatene portuges, tanba ne'e husu ba deputadu sira halo intevensaun ho lian tetun," dehan deputada Olinda Guteres iha PN, Kuarta (17/06).

Deputada Fernanda Lay la simu ho deklarasaun ne’e no hatete katak deputadu sira ko'alia lian portuges iha PN bazeia ba Konstituisaun RDTL artigu 13 ne’ebé hatete lian portuges no tetun nu’udar lian ofisial.

Kontradisaun ne’e hahú hamosu emosaun entre deputada na’in rua ne’e no hahú sadik-malu.

"O hira fali, ha’u la eskola ha’u la komprende saida mak ita-boot ko'alia, se ita-boot koalia portuges ne'e oinsa mak povu bele rona saida mak ita-boot koalia," dehan Olinda.

Maibé Fernanda Lay hatan: "Ha'u koalia portuges, lian portuges tanba Konstituisaun mak fó dalan, se lakohi koalia lian portuges di’ak liu hasai tiha artigu 13 Konstituisaun RDTL."

Hafoin koalia nune’e, ho emosaun deputada Fernanda Lay hakat kedas ba deputada Olinda Guteres hodi hamosu asaun brutalizmu.