Komunidade sira husu ba Prezidente Repúblika, Taur Matan Ruak hodi fó orden ba polisia atu matan  moris neon nain atu kontrola ai moruk ilegál hirak ne'e iha fronteira.

Preokupasaun ne'e komunidade sira hato'o tanba  droga sai hanesan ameasa boot ba futuru juventude bainhira konsumu.

“Ita haree iha televizaun, ema barak preokupa kona-ba Droga tama ilegál,  se ema lori mai liuhusi aviaun ne’e ita bele haree, maibé se liu husi rai, ita sei la hare tanba rai ne’e luan loos,” dehan  reprezentante Komunidade Motaél, Francisco Sarmento durante diálogu ho PR Taur, Segunda (30/01).

Hanesan povu kiik, nia konsidera Timor labele sai fali fatin transit, tanba realidade hatudu katak, polisia kaer ona ema barak lori droga mai hosi Singapura no Austrália liuhusi Aeroportu Komoro no fronteira sira.

Hataan ba preokupasaun ne’e, Prezidente Taur  dehan, PNTL parte Unidade Patrollamentu Fronteira (UPF) halo seguransa makaas atu identifika sasan ne’ebé lori tama liu husi fronteira.

Entretantu, Segundu Komandante Polisia Nasionál Timor Leste (PNTL) Munisípiu Dili, Superintendente, Euclides Belo husu ba populasaun sira bele koopera hamutuk ho polisia bainhira haree ema lori ai moruk droga.

Nia dehan, durante ne’e PNTL kaptura ona autór feto no mane inklui sidadaun estranjeiru balun no hatama tiha ona ba komarka.