Arguidu João baku lezada Suzi tanba la simu ho sasin ne’ebé nia feen hato’o durante prosesu julgamentu iha Tribunal Distrital Dili (TDD).

Hafoin baku lezada, Polisia ne’ebé serbisu iha TDD bolu arguidu hodi fó xamada atensaun.

Hasai Liafuan At

Arguidu João Batista ba hatan iha Tribunal tanba komete krime violensia domestika tuir artigu 145 Kodigu Penál Timor-Leste.

Tuir akuzasaun husi Ministériu Públiku, kazu ne’e hahú iha 7 Outubru 2014 bainhira lezada husu osan ba arguidu atu sosa hahan ba labarik maibé arguidu nonok de’it.

Iha loron 5 Setembru 2014, hafoin fila husi serbisu arguidu fó osan ba arguidu nia alin feto ba sosa supermi hodi tein han, hafoin ida ne’e arguidu foti xave motor atu sai, nune’e lezada husu ba arguidu atu ba ne’ebé, maibé arguidu hatan ho nervozu no husu atu lezada labele mete.

Rona liafuan ne’e, lezada mós nervozu no deside hodi sai husi uma no ba toba iha nia bin sira durante loron rua, kalan rua.

Hafoin, arguidu ba hasoru lezada hodi tuku lezada nia tilun hun dala ida, hirus-matan dala ida no tuku dala-barak iha lezada nia kotuk laran to’o lezada mi an.

Arguidu deklara katak faktus ne’e balun loos no balun sala, tanba nia la baku lezada to’o mi an maibé nia hasai de’it liafuan at.

“Ha’u dehan ‘hei… feto Ó ba ne’ebé mak sai la fó hatene ha’u?’ tanba ne’e mak ha’u tolok nia. Primeiru ha’u lori sumasu mak baku nia maibé, nia foti ha’u-nia laptop riba ba rai, rahun hotu, ida ne’e mak ha’u nervozu hodi basa nia hasan dala rua, maibé tuku to’o mi ne’e laiha,” dehan arguidu ba Tribunál.

Iha fatin hanesan, lezada Suzi dehan faktus ne’ebé MP lee sai ne’e loos hotu.

Nia dehan, iha momenetu ne’eba arguidu baku nia to’o nia mi an.

“Depois nia baku hotu, ha’u ba kesar iha polisia, iha loron ne’e kedas polisia mai kaer nia ba kormaka iha Polisia Komoro kalan ida iha ne’eba,” dehan lezada.

Liu husi alegasaun ne’e, Ministériu Públiku husu ba Tribunál atu fó pena prizaun tinan ida suspende ba tinan tolu (3).

Entretantu, Defensór Públiku husu ba Tribunál atu fó pena ne’ebé kman tanba arguidu arepende ona sala ne’ebé nia halo no promete sei la halo tan.

Audensia julgamentu ne’e prezide husi Juiza Singular Francisca Cabral. Ministériu Públiku reprezenta husi Prokuradór Ivonia Gueterres, no arguidu hetan asistensia legal husi Defensór Públiku Estagui.