Iha 5 Maiu 2018 tuku 9.00 dader, feen ida ho inisial CPS telefone ba nia laen ho inisial ABA atu husu lisensa lori sira-nia oan ba halimar iha CPS nia inan-aman nia uma iha area Santa Kruz.

ABA ne’ebé simu telefone husi nia feen ne’e la konkorda ho nia feen atu lori sira-nia oan ba nia banin nia uma ho razaun labarik sei kiik.

Maske ABA lakohi, maibé CPS deside hodi lori sira-nia oan ba halimar iha Santa Kruz. Ho nune’e, hafoin fila husi serbisu, ABA hahú baku nia feen ne’ebé nia hola iha tinan 2014 no hahoris ona oan ida.

Tuir akuzasaun husi Ministériu Públiku (MP), arguidu ABA lori aisar masa hodi baku lezada CPS nia kabas, liman, kanotak no kanuruk dala ida.

“Kunsekuensia husi arguidu nia hahalok ne’e halo lezada sente morsa iha nia isin lolon. Lezada mós ba halo tratamentu iha PRADET,” deklara MP iha ninia akuzasaun durante audensia julgamentu iha Tribunal Munisipiu Dili (TMD), Tersa (19/03).

Ho hahalok ne’e, MP akuza arguidu hanesan ko-autór material ho forma konsumadu ba pratika  krime ida violensia domestika ho forma ofensas integridade fiziku simples.

Ba akuzasaun ne’e, arguidu deklara nia baku duni nia feen tanba nia feen lori sira-nia oan ne’ebé sei kiik ba halimar iha nia banin ninia uma.

“Ha’u baku duni nia ho aisar masa. Problema ne’e foin primeira ves, depois problema ne’e hotu to’o agora ami la problema tan ona,” dehan arguidu.

Enkuantu lezada deklara, nia laen baku nia tanba nia lori duni sira-nia oan ba halimar iha nia inan-aman nia uma iha Santa Kruz.

“Iha momentu ne’eba ami ba duni Santa Krus, fila mai mak arguidu baku ha’u,” dehan lezada.

Iha alegasaun final Ministériu Públiku husu ba Tribunál atu aplika pena adekuadu ba arguidu. Enkuantu parte defeza husu aplika pena amoestrasaun atu iha futuru arguidu labele halo tan hahalok hanesan ne’e.

Tribunál deside adia julgamentu ba 7 Marsu 2019 Tuku 11.30 dader hodi rona desizaun final.