Iha tinan 2015, Tribunal Munisipiu Dili (TMD) hakotu katak arguidu JMDX fahe-malu ho nia feen kaben ho inisial PCA.

Iha ninia desizaun ne’e, tribunal ne’ebé haree katak JMDX ho PCA iha ona oan na’in rua, KMSX (15) no ODXS (13) deside mós katak arguidu tenke responsabiliza ka kontribui hodi sustenta alimentasaun, saúde, edukasaun no roupa ba labarik sira.

Maibé ikus mai JMDX la kumpri desizaun husi tribunal, nune’e JMDX tenke tuir tan prosesu julgamentu iha tribunal.

Durante tinan 3 ona arguidu JMDX la responsabilidade ba lezada (hanesan Fen kaben) ho nia oan rua ne’ebé idade sei menuridade hela.

Tuir Ministériu Públiku, hafoin tribunal hasai desizaun iha tinan 2015 to’o agora arguidu la kumpri no la haruka osan ba sira-nia oan ninia konta bankaria iha Banku Mandiri.

“Arguidu hanesan aman ba labarik sira, no hanesan ema emprezariu, ne’ebé iha responabilidade atu hamutuk ho lezada atu tau-matan ba oan sira-nia futuru,” deklara MP liu husi audensia julgamentu iha TMD, Tersa (19/03).

“Konsekuensia husi arguidu nia hahalok ne’e halo lezada sofre. Hanesan inan ida tenke buka osan tun-sa’e hodi sustenta no eduka nia oan na’in rua ne’e,” MP hatutan.

Tuir MP, arguidu halo nia hahalok ne’e ho livre no konsiente tanba nia rasik hatene nia dever nu’udar aman la halo tuir regulasaun ba paternal.

Ho nune’e, MP akuza arguidu hanesan autor ba krime la kompri obrigasaun alimentar ne’ebé previstu iha artigu 225 kodigu penal.

Tribunal deside hodi adia julgamentu ba loron seluk hodi rona alegasaun final.