Tuir dadus ne’ebé PJR rekolla hatudu katak iha kazu balun molok karreta no motor tama mai Timor-Leste dokumentu no xapa matrikula iha ona.

PJR konsidera katak fronteira rai-maran iha area Batugade no Wini-Oekusse sai hanesan area kritiku ba atividade kriminal no transaksional. Durante ne’e, iha area rua ne’e sempre mosu atividade illegal.

Prokuradór Jeral Repúblika (PJR) José da Costa Ximenes informa katak, iha fronteira Batugade no Wini sempre mosu kazu kontra bandu, hatama kombustivel no veikulus illegal.

Tuir dadus PJR nian, José dehan, iha tinan 2015 husi tipu krime kontra bandu no krime ekonomiku iha total kazu 32 ne’ebé pendente ba tinan 2016 no kazu entrada ba tinan 2016 hamutuk 87. Husi total ne’e, Ministériu Públiku akuza kazu 58, arkiva kazu ida (1) no pendente kazu 28. Ba tinan ne’e kazu pendente sei iha hela prosesu nia laran.

“Iha tinan 2015-2016 marka forma kriminalidade organizasaun transaksional ida ne’ebé boot no kompleksidade. Dala-ruma mós envolve ema estranjeiru no mós Timor-oan rasik iha fronteira,” dehan Prokuradór José foin lalais ne’e.

Iha tinan 2016, nia hatete, hafoin Gabinete Sentral Kombate Korupsaun no Kriminalidade –PJR nian hamriik, hahú organizada no dezenvolve nia funsionamentu, nune’e hahú hala’o investigasaun.

José hatete, ba prosesu balun deteta iha periode 1 Janeiru no 15 Febreiru 2016 argidu ida de’it konsege hatama karreta ho marka Toyota Avansa no Inova unidade 40.

“Ikus mai ita deskobre bainhira ita halo aprensaun ba karreta unidade 5 iha Maliana parte Tunu-bibi,” katak nia.

Aleinde karreta, nia dehan nia parte serbisu hamutuk ho PNTL Maliana no Suai konsege halo apriensaun ba motorizada 30 ne’ebé tama illegal mai Timor-Leste.

“Agora dadaun dokumentu husi viaturas hirak ne’e iha hela PNTL Maliana no iha Prokuradoria Republika Munisipiu Suai,” katak nia.

Prokuradór ne’e dehan, kazu ne’e akontese tanba pesoal balun iha DNTT mak fó suporta.

“Iha kazu balun ne’ebé akontese karreta no motor balun seidauk to’o maibé surat no xapa matrikula iha hotu ona, ho situsaun sira ne’e funsionariu rua hetan ona akuzasaun husi MP tanba partisipa iha situsaun ne’e,” katak nia.

Aleinde ne’e, nia informa, iha tinan 2016 PJR ho PNTL konsege apriensaun ba kombustivel hamutuk toneladas 35. Kombustivel hirak ne’e daudaun ne’e iha hela Komando Munisipiu Bobonaro.

Tanba ne’e, nia dehan, governu presija tau atensaun maka’as hodi reforsa dixiplina no sistema kontrolu iha Batugade no Wini no iha fatin sira seluk iha area fronteira rai-maran no portu Dili liu husi meius ekipamentu, rekursu umanu, no seluk-seluk tan hodi kombate kriminalidade organizada transaksional.