Tuir akuzasaun husi Ministériu Públiku, arguidu ho inisial FT halo agresaun fiziku hasoru nia oan feto ho inisial RT.

Liu husi audensia julgamentu iha Tribunal Distrital Dili (TDD) Tersa (20/06) Juiz Singular lee sai akuzasaun husi Ministeriu Públiku katak, iha 07 Fevereiru 2016, tuku 8 kalan, bainhira arguidu fila husi servisu-fatin la hetan lezada iha uma, nune’e besik oras toba, lezada foin tama ba uma-laran.

Arguidu ne’ebé nervozu la husu tan ba lezada, maibé nia foti aisar hodi baku ba lezada nia liman dala rua, kabun dala ida, no ulun fatuk dala rua, hafoin nia duni sai lezada husi uma atu ba hela iha Ainaro.

Arguidu hatete “Ó sai husi uma ida ne’e ba hela ho Ó nia inan, tanba Ó la’os ha’u-nia oan, ha’u-nia oan ema hansan Ó mak laiha.”

Rona ida ne’e, lezada foti nia roupa hodi halai ba Ainaro no hela ho nia inan besik fulan rua nia laran.

Tuir MP, konsekuensia husi arguidu nia hahalo ne’e halo lezada hetan moras iha kabun no bubu, tanba arguidu baku kona iha lezada nia kanek, fatin opera. Iha parte seluk halo moras mós iha lezada nia ulun no bubu iha liman.

MP akuza arguidu ba Krime Violensia Domestika ne’ebé previstu iha artigu 145 númeru 23 KP-TL.

Hatan ba akuzasaun ne’e, arguidu hatete nia baku lezada tanba rona lia husi viziñu katak lezada kalan kalan sai husi uma bainhira nia inan-aman toba dukur hotu.

“Ha’u baku nia atu hanorin, lezada hanesan ha’u-nia oan feto, boot tiha ona lakohi halo servisu iha uma, nia mak loron konta istoria, depois ita sai servisu kalan boot mai mak rona tam ema koalia katak ita-nia oan feto boot sai kalan-kalan, tanba ne’e mak ha’u hirus hodi baku ho aisar,” dehan arguidu.

Entretantu, lezada dehan nia aman baku nia tanba nia sai hela de’it hodi ba halimar iha nia kolega nia uma.

“Loos duni iha loron ne’e apa baku duni ha’u tanba rona mana sira viziñu hato’o lia ba Apa katak hau sai kalan-kalan ho kareta, maibé ne’e la loos, ha’u so ba halimar iha ha’u-nia bin sira nia uma de’it,” dehan lezada.

Rona deklarasaun ne’e, Tribunál submete kedas ba alegasaun final. Liu husi alegasaun MP husu ba Tribunál aplika pena prizaun fulan neen (6) suspende ba tinan rua (2). Husi parte defeza husu atu aplika pena ne’ebé justu, tanba arguidu arependementu no promete sei la halo tan krime kontra nia familia rasik ka ema seluk.