Vise-Xefe Estadu Maiór Jenerál F-FDTL, Brigadeiru Jenerál Filomeno Paixão hateten, bainhira membru na’in rua komete kazu iha fatin akontesimentu, komandante kompañia rasik evakua kedas membru na'in rua ne’e iha komponente Terestres Baukau.
Nune’e, Komandante ne’e informa, iha loron (27/6) membru na'in rua ne’e rasik konsege hataan iha Departamentu Justisa Militár hodi kontinua prosesu investigasaun no hein desizaun husi komandu F-FDTL.
“Sira na’in rua konsege hasoru ha’u no hataan ona iha justisa prosesa kedas sira na’in rua no dezarma kedas sira rua”, dehan Filomeno, iha Sentru Formasaun F-FDTL, Metinaru-Dili, horisehik.
Nia dehan, bainhira membru na'in rua ne’e maka komete tan kazu ruma sei hato’o karta ba jenerál hodi demite husi F-FDTL.
Hafoin investigasaun remata evakua hikas membru na’in rua ne’e ba Primeiru Batallaun Komponente Baukau ho dezarmadu hodi hamoos rai iha komponente no hein prosesu investigasaun kazu ne’ebé membru na’in rua ne’e komete.
Membru na'in rua ne’e, komete bainhira hemu tua lanu hodi gás motór tun-sa’e iha momentu partidu polítiku balun hala’o atividade kampaña iha Manufahi.
Brigadeiru Jenerál dehan, tuir lei militár nian iha dalan tolu mak sei foti hanesan separasaun servisu, suspensaun, detensaun no prizaun.
Tuir nia, membru forsa armada sira husi 08 to’o 015 mesak kontratadu, bainhira komete kazu ruma sei demite husi instituisaun F-FDTL.
Entretantu, Ministru Defeza, Cirilo Cristóvão hateten, forsa armada iha diretu votu la’ós direitu ezerse polítika, militár tenke asegura seguransa ho hodi hametin seguransa ba eleisaun parlamentár.
“Horisehik ha'u rona, iha Betanu membru forsa hemu lanu hodi halai tun-sa’e. Ha’u mós husu ba Brigadeiru atu lori mai”, dehan nia.
Nia mós husu ba Brigadeiru Jenerál F-FDTL hodi haree ba gravidade infrasaun dixiplinár ne’ebé membru ne’e komete iha Betanu.
Tuir Cirilo, atu sai forsa tenke dixiplina ho profisionál hodi ezerse funsaun orientasaun komandante sira.
Ne’e duni, nia apela ba membru F-FDTL sira, liuliu ba prasa sira tenke mantein dixiplina. Bainhira membru sira maka komete kazu sei prosesu no demite husi instituisaun.
