Segundu Komandante PNTL Munisípiu Dili, Superintendente Asistente Euclides Belo dehan, durante loron rua seksaun tránzitu halo infrasaun ba viatura privadu públiku ho governu nian hamutuk 64.
“Ami halo operasaun konsege prende transporte lubuk ida budu iha ami nia fatin”, dehan nia, iha edifísiu Komandu PNTL Munisípiu Dili, Kaikoli, horisehik.
Nia dehan, operasaun ne’e rasik konsege identifika viatura sira maioria laiha dokumentu ho laiha asesoria motór.
Belo haktuir, operasaun ne’e halo durante loron rua nia laran identifika motór ho kanu racing 12, PNTL halo infrasaun hodi fó multa bazeia ba regulamentu infrasaun ne’ebé eziste ona.
Ba karreta governu nian, nia dehan, motorista lori karreta ne’e la tuir regra tránzitu. Tanba ne’e, iha operasaun rasik mós konsege prende tiha viatura estadu nian husi ministériu balun.
Tanba ne’e, komandu kontinua alerta membru sira liuliu seksaun tránzitu halo infrasaun ba viatura públiku no privadu tantu governu nian.
Observasaun diáriu ne’e, katak daudaun ne’e operasaun kontinua la'o. Alende ne’e viatura sira hetan prende daudaun budu iha ambiente munisípiu Dili.
Bandu Membru Governu Uza Patrimóniu Estadu iha Kampaña
Entretantu, Superintendente Asistente Euclides hateten, tama tempu propaganda eleitorál, PNTL haforsa seguransa ba funsionáriu públiku bandu labele lori patrimóniu Estadu hodi partisipa atividade kampaña partidu polítiku.
Nune’e mós iha eventu kampaña rasik maka identifika, membru PNTL sira sei la tolera funsionáriu sira ne’ebé privatiza patrimóniu Estadu nian hodi haforsa atividade kampaña eleitorál.
Ne’e duni ba oin, PNTL kontinua hametin operasaun iha dalan alternativa haat ba munisípiu sira hanesan Tasi-Tolu, Lahane ho Kristu Rei ho Fatu-Ahi. Área hirak ne’e sai odamatan ba funsionáriu sira utiliza lori patrimóniu Estadu nian ba tuir kampaña iha munisípiu.
Alende ne’e, PNTL sei koordena ho Komisaun Nasionál Eleisaun (CNE), Provedoria Direitu Umanu no Justisa (PDHJ) no Diresaun Nasionál Transporte Terrestre (DNTT) hodi observa no halo operasaun ba patrimóniu Estadu ne’ebé tuir kampaña.
Nune’e, bainhira operasaun maka identifika, polisia halo investiga no lori ba tribunál hodi prosesa tuir lei.
