Segundu Komandu Jerál PNTL, Komisáriu Faustino da Costa hateten, iha fulan rua nia laran komandu PNTL rejistu kazu asidente tráfegu 352 ho númeru makaas liu iha kapitál Dili.

Komandu polisia konsidera sériu, tanba númeru ne’e aumenta makaas. Ne’e duni, parte seguransa halo ona vijilánsia makaas hodi kontrola rodoviariu iha Timor laran tomak.

Nia dehan, komandu kontinua alerta ba membru, liuliu seksaun tránzitu kontinua halo operasaun ba viatura sira atu minimiza asidente tráfegu.

Komisáriu PNTL hatete, Komandu PNTL Ne’ebé maka halo operasaun ba viatura sira fahe ba grupu kalan no loron.

Prende Viatura 366

Komisáriu ne’e afirma, iha fin de semana ne’e PNTL Munisípiu Dili konsege prende transporte públiku sira hamutuk 250 no motorizada 116 ne'ebé maioria laiha dokumentu no mós uza kanu racing.

Nia dehan, operasaun ne’e rasik Komandu PNTL Dili liu husi seksaun tránzitu halo ba mikrolete ho taksi sira ne'ebé durante ne’e sirkula iha Kapitál Dili.

“ita nia transporte públiku sira ne’ebé maka halo operasaun iha Dili laran la ho kondisaun di'ak”, haktuir Faustino, iha servisu fatin, Kuartél Jerál PNTL, Kaikoli-Dili, horisehik.

Nia dehan, dala barak movimentu transporte sira ne’ebé tránzitu sira halo infrasaun maioria kontra kódigu estrada.

Nune’e, motór ne’ebé halo infrasaun ne’e maioria barak maka sempre kontribui ba asidente tráfegu tanba laiha dokumentu no materiál kompletu.