Hahalok nee konsidera envolve krime Violénsia Doméstika tuir artigu 145 Kódigu Penál Timor Leste.

Tuir akuzasaun husi Ministériu Públiku (MP) ne’ebé Tribunál lee sai katak kazu nee akontese iha loron 20 fulan Jullu tinan 2016 oras la termina, iha área Pantai Kepala besik pertamina, suku Komoro.

Iha altura ne’ebá,  lezada hetan baku husi  nia namoradu ne’ebé hanesan arguidu Salomão dos Santos.

Arguidu balu ho kapasete iha lezada nia ulun dala ida, basa dala ida iha parte ibun ne’ebé ikus mai  hetan bubu no raan sai barak.

Tuir mai arguidu mos kontinua tuku dala tolu iha parte kidan sente moras no bubu.

Arguidu baku lezada tanba iha dader, arguidu telefoni ba lezada maibé la atende tanba lezada foin fila husi Vikeke sente kolen no deskansa.

Konsekuensia husi arguidu nia hahalok ne’e halo lezada nia raan sai husi ibun no moras, bubu iha kotuk laran.

Tanba n’e mak ministériu Públiku akuza arguidu sai hanesan autór material ba   krime Violensia Domestika iha artigu 145 tuir kodigu penal Timor-Leste ninian.

Lee sai hotu azuksaun ne’e, Tribunál husu ba lezada atu dada fali keixa ne’e tanba kazu ne’e semi publiku ne’ebé lei fó dalan bainhira lezada hakarak dada fali.

Iha fatin hanesan lezada mos informa ba Tribunál katak,  hakarak kazu ne’e rezolve  tuir familia de’it.

“Ha’u hakarak kazu ne’e rezolve tuir familia deit, depois mak ami halo akordu hodi mai Tribunál,” dehan lezada ba Tribunál Sesta (10/03).

Mministériu Públiku no Defensória Públiku konkorda ho lezada, depois arguidu ho lezada rezolve tuir familia no halo akordu hodi mai Tribunál.

Iha audensia julgamentu ne’e prezide husi juis singular Albertina Neves, Ministériu Públiku reprezenta husi Prokuradór Domingos Barreto, arguidu hetan asistensia legál husi Defensór Públiku Manuel Sarmento.