Tuir akuzasaun husi Ministériu Públiku, arguida SP baku nia laen, JB tanba deskonfia JB selingkuh ho feto seluk bainhira SP isin-rua todan.
Liu husi audensia julgamentu iha Tribunal Distrital Dili, MP lee sai kronolojia katak, iha 26 Fevereiru 2015 tuku, 09:00 kalan, iha Lahane Oriental lezadu JB kondus motorizida atu ba kolega nia uma, maibé arguida SP hein hela iha dalan hodi asaltu lezadu, tuku lezadu iha ulun maibé la kona tanba lezadu uza kapaseti. Bainhira lezadu hasai tiha kapaseti, arguida baku lezadu nia ulun uza ai ne’ebé monta ho pregu, baku iha ulun dala 3 no rezulta arguidu hetan kanek.
Hafoin hetan baku, lezadu tuun husi motor leten atu defende an, arguida foti fatuk boot ida hodi tuda tan lezadu nia ain fukun no halo lezadu la’o la di’ak.
Konsekunsia husi akontesimetu ne’e lezadu ba halo tratamentu iha ospital no tenke deskansa iha uma durante semana ida nia laran.
Lezadu deklara katak, nia la hatene tanba sa mak arguida ba asalta nia.
Tan ne’e, MP akuza arguida halo hahalok ne’e ho forma konsiente, livre deliberada. Arguida hatene katak baku lezadu bele hakanek, hamoras lezada nia isin, mezmu hanesan ne’e, nia hakarak baku lezadu no kontra lezadu nia vontade, Arguida mós hatene katak, hahalok ne’e probidu no punida iha lei.
Tan ne’e, MP konsidera arguida nudar autora material ho forma konsumadu ba krime Violensia Domestika ofensas integridade simples, iha artigu 145 husi kodigu penal.
Rona akuzasaun ne’e, arguida deklara katak faktus ne’e loos hotu. Nia asaltu no tuda duni arguidu tanba momentu ne’e lezadu husik hela arguida isin-rua, fulan 8, hodi ba hola fali feto seluk iha Lahene Osidental.
“Iha momentu ne’e ha’u nia alin feto hanesan eskutéru iha igreza Balide, bainhira nia fila hetan ha’u-nia lean (lezadu) tula feto ida ho motor. Nia fila mai uma nia fó hatene ha’u dehan Bin, ohin ha’u hare bin nia katuas oan tula feto ida ba iha diresaun Lahane Osidental nian, tanba ne’e ho nervozu ha’u ba kedan iha Lahane Osidental hodi hatene. Tanba ho nervozu no ho kondisaun labarik fulan 8 iha kabun laran ne’e mak ha’u konsege baku duni lezadu,” deklara arguida iha audensai julgamentu iha TDD, Segunda (13/03).
Hafoin problema ne’e, arguida dehan, nia ho nia laen laiha ona problema no moris hamutuk hanesan baibain.
Entretantu, JB rekoinese katak, nia hola duni feto seluk, maibé dezde problema ne’e mosu nia la hamutuk tan ona ho feto ne’e, no agora hela hamutuk fali ho nia fen no nia oan sira.
“Iha momentu ne’eba ha’u atu ba duni kolega nia uma maibé derepente de’it arguida asalta ha’u, tuda no baku ho ai, no tuda ho fatuk iha ha’u-nia ain,” deklara nia.
Rona tiha deklarasaun ne’e, tribunál submete kedan ba iha alegasaun. Iha alegasaun MP husu ba tribunál atu aplika pena prizaun tinan ida no suspende ba tinan ida fulan 6. Husi parte Defeza husu ba tribunal atu aplika pena ne’ebé kaman no justu ba arguida.
Tribunál adia julgamentu ba 14 Marsu 2017 tuku 2:00 loraik hodi rona desizaun final.
Audensia julgamentu ne’e prezedi husi Juis Singular, Edite Palmira, Ministériu Públiku reprezenta husi Prokuradór José Ello, no arguida hetan asistensia legal husi Defensór Públiku, José da Silva.
