Ida ne’e mak akontese ba Pedro Freitas ne’ebé tenke ba hatan iha Tribunal Distrital Dili (TDD) tanba baku nia fen, Josefina Goncalves.
Tuir akuzasaun ne’ebé Ministériu Públiku lee sai iha TDD katak, kazu ne’e hahú iha tinan 2015 bainhira lezada Josefina nia inan husu ba arguidu Pedro atu labele deskonfia bebeik nia oan. Rona ida ne’e, arguidu deside hodi sai husi uma no ba hela ketak.
Iha 11 Outrbru 2016 tuku 10:30, arguidu telefone ba lezada hodi husu lezada nia password Facebook no Email, maibé lezada la simu telefone. Arguidu kontinua manda mensajen ba lezada, maibé lezada la responde.
Nune’e, iha menutu balun nia laran, arguidu ba iha lezada nia serbisu fatin, Hudi-laran, tama diretamenta ba iha lezada nia serbisu fatin, maibé lezada nia kolega sira dehan lezada sai ba li’ur.
Arguidu sai ba li’ur no nia haree lezada ho nia kolega feto ida. Arguidu bolu lezada atu sa’e motor, maibé lezada nia kolega kaer metin lezada, nune’e arguidu ho nervozu rasta lezada nia liman no hakuak metin, dudu ba paredi no kontinua buti lezada nia kakorok, tuku dala ida iha inus hodi rezulta bubu metan.
MP akuza, konsekuensia husi arguidu nia hahalok ne’e halo lezada tenke ba halo tratamentu iha Sentru Saúde Komoro no lezada la tama serbisu durante loron rua.
MP deklara, arguidu nia hahalok ne’e ho forma livre, konsiente, hodi hamoras, hakanek lezada nia isin lolon, no kontra lezada nia vontade tomak. Nune’e, MP akuza arguidu komete krime violensia domestika ne’ebé previstu iha artigu 145 kodigo penal.
Hatan ba akuzasaun ne’e, arguidu deklara katak, faktus ne’e balun loos no balun sala.
Nia dehan, nia ba duni lezada nia serbisu fatin maibé nia la hakuak metin, buti no tuku lezada.
“Ha’u nervozu tanba lezada lakohi fó password ne’e mak ha’u tuku iha parede, kois mak kona iha lezada nia inus,” dehan nia.
Arguidu mós deklara, nia deskonfia lezada selingkuh tanba rona informasaun husi kolega sira.
Pedro dehan, hahalok sira ne’ebé nia halo ba lezada la ho intensaun maibé ho nevozu.
Iha fatin hanesan, lezada deklara nia sei hadomi nafatin nia laen, maibé nia husu atu nia laen tenke hapara ona hahalok at ne’ebé durante ne’e nia halo.
“Problema ne’e nia huun mai husi password email no FB (Facebook), tanba ha’u la fó (password) ne’e mak arguidu mai baku ha’u iha ha’u-nia office (serbisu fatin),” deklara nia.
Rona deklara husi parte rua, tribunal husu ba MP atu kontinua ba alegasaun. Iha alegsaun, MP husu ba tribunal atu aplika pena prizaun fulan 6 no suspende ba tinan 1. Husi parte defeza husu ba tribunal atu aplika pena multa ba arguidu ho valor $30.
Tribunal adia julgamentu ba 24 Marsu 2017 tuku 9:30 dader hodi rona desizaun final.
Audensia julgamentu ne’e prezide husi Juiza Singular, Maria Solana. Ministériu Públiku reprezenta husi Prokuradóra Ivonia Guterres, no arguidu hetan asistensia legal husi Defensóra Públika Olga Bareto.
