Embaixadór Xina mai Timor-Leste Liu Hongyang hatete, Timor-Leste hahú deklara nia independénsia iha tinan 2002, nasaun Xina iha momentu ne'ebá halo servisu bilaterál ho Timor hodi reforsa iha área seguransa no defeza hodi hametin estabilidade iha momentu ne’e.
Nasaun Xina hanesan nasaun ne'ebé mak dezenvolvidu iha área ekonomia no teknolojia iha esperiénsia boot tanba ne’e iha kometimentu hodi ajuda nafatin Timor-Leste tanba nasaun rua ne’e iha relasaun di'ak.
Iha prosesu servisu bilaterál ne'ebé mak rai rua ne’e halo governu Xina sempre ajuda Timor hodi sai hanesan ponte atu lori timor envolve aan iha organizasaun mundiál sira iha Nasoins Unidas no iha kontinente seluk.
Tuir embaixadór ne’e, iha 2014 primeiru ministru Xanana Gusmão ba hasoru malu ho Prezidente Repúblika Xineza Xi Jinping hodi kolia kona ba progresu servisu bilaterál Timor-Leste ho nasaun Xina ne'ebé hahú estabelese iha 2002, no haree mós nia kontinuasaun servisu bilaterál hodi hametin nafatin atu nune’e nasaun rua ne’e bele sai hanesan parseiru di'ak iha futuru hodi servisu hamutuk iha área importante sira ne'ebé fó benefísiu ba povu no nasaun.
Hahú nasaun rua ne’e estabelese servisu bilaterál iha 2002 governu Xina investe hodi hadi'a no dezenvolve Timor-Leste iha setór importante hanesan parte defeza no seguransa, liu husi projetu boot ne'ebé mak Xina oferese mai Timor hanesan konstrusaun pallasu Presidente no ministériu defeza no F-FDTL no iha seguransa nian iha Agostu tinan 2016 to’o Marsu 2017 kontinua fó asisténsia hodi konstrui CCTV no ajuda ekipamentu atu PNTL bele halo monitorizasaun hodi mantein estabilidade tuir orden públiku.
Iha tinan naruk nia laran kooperasaun bilaterál TL iha infraestrutura hanesan eletrisidade nasionál ne'ebé konstrui husi kompañia Nukleár Industry 22 no ohin loron projetu tasi mane hanesan Auto Estrada ne’ebe mak liga beaco-suai ne’ebe importante tebes ba projetu tasi mane ne'ebé konstrui husi kompañia Xina.
Xina mos fo oportunidade ba estudante Timoroan 100 hodi ba hala’o sira nia estudu iha universidade ne’ebe mak top iha nasaun refere no sira mos fo ona treinamentu ba ema 1000 iha area tekniku, ospitalidade, konstrusaun sivíl, Indsutry enjeñaria, operasaun mákina, administrasaun, agrikultura, peska no seluk tan.
Iha parte seluk Xina kontinua fó nafatin asisténsia no ajuda ba iha parte saúde nian tanba ne’e sira a loka nian doutór 90 no ekipa médiku na'in 7 hodi mai servisu iha ospitál nasionál sira.
