×

Atenção

JUser: :_load: Não foi possível carregar usuário com ID: 428

Osan Naok Ikan Tubaraun Seidauk Tama Ba Bankária Governu

By Marsu 30, 2017 1394
Marina kaer peskador ilegal Marina kaer peskador ilegal

DILI: Kazu Xineza Kompañia Fuzhou Hong Long Ocean Fishing Co. Ltd ho ró boot 15 na’ok ikan tubaraun tonelada 43 too agora seidauk selu osan ka haruka ba bankária governu nian.

Kazu na'ok ikan ne’e rasik, Governu forma ona ekipa investigasaun kompostu hosi ekipa MAP, no polisia hala’o ona investigasaun hodi integra ona relatóriu ba governu.

Diretór, Jerál Peskas, Acácio Guterres dehan, MAP rejista ona bankária ho númeru 28624810,001 iha BNU too agora osan seidauk tama.

“Konta bankária Ministériu Finansas mak fó mai ho númeru mak 28624810,001 tanba iha informasaun balun dehan osan tama fali ba konta bankária Ministru nian ne’e laloos tanba osan ne’e ita pasa dokumentu de’it ba selu tiha mak lori fali mai,” dehan Acácio Guterres ba INDEPENDENTE iha nia knaar fatin MAP Komoro, Kuarta (29/03).

Acácio informa kestaun ne’e hodi rejeita informasaun ne’ebé sirkula iha públiku katak, kompañia haruka osan ba konta bankária MAP ne’e laloos.

Nia dehan, MAP rasik too agora seidauk hatene osan ne’e selu ona ou seidauk, tanba kazu na'ok ikan tonelada 43 nu’udar problema ida ne’ebé governu hasoru no investiga ona.

Nia hatutan, iha altura ekipa ba hala’o investigasaun ba ikan ne’ebé kompañia sira kaer haree de'it iha tasi leten no ró sira ne’e la fila para iha portu, tanba TL la iha portu boot.

“Portu peska nian ba daudaun seidauk iha tanba iha altura ne’ebá halo de'it verifika iha tasi laran, no ró tasi kuandu boot fó ameasa boot ba sira nia vida,” tenik nia.

Nia dehan,konta bankária ne’e atu hatudu ba públiku katak ne’e la’ós konta bankária MAP nian, maibé konta bankária governu nian ne’ebé Ministériu Finansas mak hatene.

Diretór ne’e mós la konsege esplika osan hira maka kompañia ne’e tenke selu ba TL, bainhira sira kaer ilegál ikan tubaraun tonelada 43.

Entretantu, antes ne’e  Deputadu Parlamentu Nasionál, Natalino do Santos  informa tuir relatóriu ne’ebé sira simu kona-ba kontratu negósiu ba presu ikan tubaraun besik tonelada 43 ne’ebé MAP fa’an ba Kompañia Fuzhou Hong Long Ocean Fishing Co. Ltd sosa kada ikan tubaraun tonelada ida fa’an de’it ho presu $150.

Ho informasaun ne’e, Natalino konsidera, governu fa’an ikan tubaraun ho presu baratu liu no halakon fali osan estadu.

“Tuir informasaun ne’ebé ami asesu katak ikan sira ne’ebé kompañia sira foti ne’e kada tonelada ida ho fa’an ho folin $150,” dehan Natalino foin lalais ne’e.

Too notísia ne’e hatún, Jornál INDEPENDENTE tenta konfirma Ministru Agrikultura no Peskas, Estanislau da Silva seidauk iha tempu atu fó komentáriu.

 

Rate this item
(0 votes)

Independente Digital TV

Tuir ami iha Twitter

Kalendariu Notisia

« July 2024 »
Mon Tue Wed Thu Fri Sat Sun
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31