Problema negosiante Xineza utiliza Timoroan sira nia naran hodi loke negosiu no hetan sertifikadu negosiu halo, governu liu hosi Ministeriu Komersiu Industria Ambiente (MKIA) susar atu taka negosiu one dollar shop.
Vise Ministru MKIA), Nino Filipus Pereira durante ne’e nia rasik ho ekipa tun ba haree ho matan no indentika atividade negosiu one dolar shop ne’e iha merkadu Dili laran haree sasán balun iha kualidade no ih mós sasán balun fa’an ho folin baratu, maibé kualidade sasán bele aat lalais.
Nino dehan, governu hakarak kontrola negósiu one dolar shop, maibé lisensa negósiu uza Timoroan sira nia naran.
“Ita halo kontrolu ba ida ne’e, hanesan sasán báziku sira ne’e. Tanba ita haree katak bainhira sira halo tratamentu ba ida ne’e lisensa ba ekonomia ida ne’e, naran Timor nian mak iha ne’ebá, maiske ita haree Xineza mak loke negósiu ne’ebá,” dehan Nino ba INDEPENDENTE iha salaun João Paulo II Komoro-Dili, Tersa (28/03).
Nia dehan Governu bele foti desizaun atu taka negósiu one dolar shop ne’e, maibé lei RDTL fó dalan se de'it mak hakarak halo negósiu.
“Ne’ebé ita taka mós la dun di’ak, ita taka dehan diskriminasaun,” tenik nia.
Fó Impaktu Ba Selu Taxa
Nino hatutan, tanba difisil atu taka negósiu one dolar shop, tanba ne’e MKIA sei koordena ho SERVE oinsá mak haree didi’ak negosiante sira Xineza sira ne’ebé loke negósiu labele utiliza naran Timoroan nian para atu halai hosi responsabilidade selu taxa ho baratu.
Nia dehan, bainhira negosiante Xineza sira ne’e halo negósiu no uza naran Timoroan nian, maka kada tinan sira sei selu taxa baratu liután.
Problema ida ne’e, halo estadu sente lakon boot atu kobra taxa kada tinan.
Iha parte seluk, Nino hatutan, governu mós sei kontrola atu negosiante Xineza tenke fa’an sasán ne’ebé iha kualidade hodi labele fó impaktu ba konsumidór sira ne’ebé sosa sasán ka produtu ruma.
Nia dehan kompañia lubuk ida mós loke namanas iha parte Komoro nian, no Bairopite.
“Ita hare kompañia lubuk ida ne’e mak loke hela parte Komoro nian, Tasi Tolu, Bairo Pite nian iha Hudi Laran nian,” tenik nia.
Nia dehan Governu la’ós atu bandu sira, maibé kompañia sira mak tenke fa’an sasán garantia ninia kualidade.
