Durante ne’e, UPM halo servisu makas tuir nia mandatu hodi garante seguransa tasi hodi kontrola peskas ilegál.

Foin lalais ne’e, UPM halo patrulamentu iha Tasi Timor parte Alor- no Kisar Indonézia haree ró ilegál rua nauk hela ikan iha tasi Timor, maibé sira duni la toman, no sira tenta tiru ameasa hodi hata'uk peskadór, maibé kilat AK 33 aat.

“Ita nia membru UPM na'in rua konsege halo intervensaun no tiru dala rua maibé kilat avaria totál, ró rua halai lakon tiha,” dehan Komandante UFM, Superintendente, Lino Saldana ba jornalista iha kapaun UPM Lesidere Dili, Tersa (7/2).

Iha 28 Janeiru 2017 liubá ne’e, povu Lautem kontaktu UPM atu kaptura peskadór ho ró ilegál rua tama iha tasi Lautem, UPM la konsege kaptura tanba kilat la funsiona.

Komandante Lino dehan, peskadór sira ne’e matenek, bainhira haree ró UPM hosi dook sira halai ona no UPM nia ró ho kondisaun la di’ak labele duni tuir.

“Loloos ne’e ita kaer tiha de’it ró rua ne’ebé hala’o peska ilegál, maibé fasilidade avaria entaun ró ilegál rua ne’e halai lakon,” tenik nia.

Kilat AK 33 ho totál 287 ne’ebé UPM uza hetan apoiu hosi forsa Malázia iha tinan 2005-2006.

Problema kilat avaria ne’e rasik, UMP hato’o ona ba Komandu PNTL no Governu bele buka solusaun.

Ró Atauru Baku Fila, Ema 7 Sai Vítima

Foin lalais ne’e ró Atauru nian ida baku iha tasi Atauru  hodi rezulta ema na’in 7 sai vítima.  

Asidente ne’e la hamate ema ruma, tanba UPF halo kedas fatin hodi salvasaun, no vítima maioria  lanu tanba hemu tasi been.

Vítima sira ne’e kompostu hosi, feto rua no no mane lima.

Ró sai husi Atauru 03:00 madrugada too tasi klaran baku fila tanba hasoru tasi boot.

“Sira na’in 7 konsege salva no evakua kedas ba Postu Atauru maibé la iha vítima ne'ebé grave,” dehan Lino

Oras ne'e, daudaun, tasi komesa boot, tanba anin sei makas no UPM aviza ona ba povu Atauru atu kuidadu halo viajen mai Dili no Atauru.